近日，有攬炒派收到選舉主任嘅提問，「轉軚」、「變臉」速度同幅度，令人為之吃驚。囍雨留意到，公民黨幾名參選人包括楊岳橋、郭榮鏗、郭家麒同鄭達鴻被問及係咪有意繼續請求美國落實對香港嘅制裁措施、有無意圖請求其他外國推動《香港民主與人權法》時，公民黨四子均否認，其中楊岳橋、郭家麒同郭榮鏗稱，國際社會做出有助維護自身利益嘅舉措，「可以理解」。不過，就喺相關新聞出街之後，有人就踢爆，原來公民黨曾經去信美國國會參眾兩院幾名領袖，「誠摯地懇求閣下及閣下的同僚們盡快通過（香港人權與民主）法案」。囍雨真心想知道，公民黨對呢封信有咩回應？為咗入閘，連自己做過嘅嘢都要「否定」？

信件猶如罪證

公民黨呢封「請求外國制裁香港」嘅信件，係舊年9月由公民黨楊岳橋、郭家麒、郭榮鏗、陳淑莊同譚文豪以公民黨嘅信箋寫俾美國國會參眾兩院幾名領袖嘅公函，內容就如上述所講，要求美國國會盡快通過「香港人權與民主法案」；眾所周知，該法案係美國為制裁香港而出台嘅，公民黨一眾立法會議員要求美國盡快通過法案，客觀效果就係要求美國「快啲」制裁香港，依家公民黨稱自己無意繼續請求美國制裁香港，大家信唔信？同埋，點解封信喺公民黨嘅網上平台都消失晒？有人想毁滅「罪證」？

說好的否決財政預算案呢？

囍雨用常理推斷，公民黨立場「急轉彎」，講到底都係為咗入閘，為咗能夠做高薪厚職嘅立法會議員，只不過，如果為咗入閘而原則、想法、政治理念都放棄，會唔會太過肉酸呢？以楊岳橋為例，佢今年3月開記者會果時，仲高調宣稱「一旦民主派達到議席過半，公民黨會否決所有政府法案、撥款申請，如果林鄭不回應五大訴求，她需要解散立法會、甚至下台」；而且，包括公民黨在內的攬炒派政客，一早已經聲明要以否決預算案嚟要脅政府，依家俾選舉主任一問，又轉口風話自己只係倡議適當地行使《基本法》賦予嘅憲制權力？囍雨睇到呢段新聞，即刻諗到楊岳橋之前話「案底令人生更精彩」，但之後就「跪低」道歉嘅醜事。

如果用一句說話去概括公民黨，囍雨大概會用「醜陋的公民黨」嚟形容呢個政黨，為咗議席，連自己做過乜、講過乜都想否定；最令人嘔心嘅係，諸如楊岳橋呢啲政客，回覆完選舉主任仲要覺得自己「好型」，用埋電影截圖話自己「覆咗喇！」；公民黨與抗爭者同行？睇嚟就唔太可能喇，佢哋最多最多，都係與百萬元年薪「同行」，盡食人血饅頭啫！


楊岳橋參選立法會新界東選舉，其他參選人包括民建聯陳克勤名單、民建聯葛珮帆名單、新民黨及公民力量李梓敬名單、林克霖、陳玉娥、熱血公民黃兆健、劉頴匡名單、何桂藍、人民力量陳志全、新民主同盟范國威名單、民主黨林卓廷名單；擬參選人物則有方國珊、希望聯盟李啟廸、鄒家成。

郭家麒參選立法會新界西選舉，其他參選人包括民建聯陳恒鑌名單、民建聯周浩鼎名單、工聯會麥美娟名單、何君堯名單、熱血公民鄭松泰、實政圓桌田北辰、屯門社區網絡張可森、黃子悅、梁飛雪；擬參選人物則有朱凱廸、天水連線伍健偉、民主黨尹兆堅、巫堃泰。

鄭達鴻參選立法會港島區選舉，其他參選人包括工聯會郭偉强名單、民建聯張國鈞名單、新民黨主席葉劉淑儀名單、袁彌昌、熱血公民莊芷茵名單、香港初心鄧偉俊、梁晃維、袁嘉蔚、民主黨許智峯。

郭榮鏗參選立法會法律界選舉。

原圖：rthk、鄭達鴻fb

請Follow我們的YouTube頻道：

https://bit.ly/2kgU8qg

https://www.speakout.hk/app