有個道理，可以令人睇真人性嘅真面目，就係如果你要睇清一個人嘅真面目，最好嘅方法就係俾權力佢；不過，原來一個人或者一班人未得到權力，大家一樣可以睇清佢哋嘅真面目，囍雨講緊咩人？梗係攬炒派政客啦！話說有數名攬炒派政客收到選舉主任嘅提問，一問之下，原來有啲攬炒派政客唔係推動外國制裁香港、唔係要否決政府法案同財政預算，甚至連反對「港區國安法」都唔係；唔通，佢哋同其他唔同政見嘅從政者一樣，都係「愛國愛港」嘅？
立場急轉彎？
對於選舉主任對攬炒派政客嘅提問，最令囍雨覺得神奇嘅，係一啲政客竟然連「港獨」都唔再支持，到底係咩驅使佢哋有呢個「轉變」？囍雨就覺得，一切皆因議席作崇！無它嘅，如果攬炒派政客成功地當選為立法會議員，佢哋未來四年嘅薪酬連埋約滿酬金，保守估計有五百萬元，當中仲要未計議員辦事處等津貼，呢份「高薪厚職」咁吸引，部分攬炒派政客突然「擁護《基本法》、效忠特區」，都唔係無理由嘅！
只不過，攬炒派咁樣做係咪符合政治倫理、對得住支持者呢？咁又係另一回事喎！今屆立法會，攬炒派最大嘅賣點，就係答應支持者要攬炒議會、癱瘓政府，逼使政府答應所謂嘅「五大訴求」；依家一班攬炒派連「入閘」都未入，就為咗議席而「縮」？咁做法，佢哋對唔對得住「手足」？又或者，就算俾佢哋成功晉身議會，佢哋到時會唔會都中晒「面目全非腳」？忘記咗自己對支持者嘅承諾？
都想買豪宅？
前排，有一位攬炒派議員被揭發原來買咗價值過千萬元嘅豪宅，令公眾嘩然，囍雨就喺度諗，依家想入立法會嘅新一派攬炒派政客，係咪都想學呢個議員咁「入議會，買豪宅」？又或者，如果立法會議員係義務工作，佢哋仲會唔會咁「不顧一切」都要入閘？如果用「食相」呢兩個字嚟形容佢哋，佢哋嘅「食相」，都真係幾肉酸！
圖片來源：政府網頁
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論