當囍雨睇到戴耀廷出咗篇文章，題目叫做《立法會議員可以反對行政長官嗎？》，就知道條友「窄窄地」，寫啲嘢實有古怪；果然，佢由《基本法》第49條寫起，講完一大堆關於《基本法》嘅分析，就得出「立法會過半數議員否決財政預算案，不是香港憲制安排下立法會議員反對行政長官的獨例」、「稱民主派為反對派，這與基本法的憲制設計是相符的，因基本法已預設了憲制的角色給反對派。反對派的『天職』就是反對」，大概意思，就係為攬炒派嘅立法會「35+」、攬炒議會計劃提供「法律基礎」；不過，囍雨想講句，攬炒立法呢件事，唔係戴耀廷按《基本法》字面解釋咁簡單囉！
未見預算案 先表明否決
對於戴耀廷對憲法嘅認識，囍雨絕對唔會懷疑，因為呢個係佢「專長」，囍雨以前睇法律書，亦睇過戴耀廷寫嘅篇章；不過，戴耀廷純用字面去解釋《基本法》，然後想「合法化」攬炒議會、講到行為不構成觸犯「港區國安法」咁，囍雨就覺得有問題，根本原因在於，財政預算案嘅內容都未有，攬炒派就話要否決，擺到明要癱瘓議會甚至逼特首落台，咁明顯係有阻撓、破壞政權機關履行職能嘅用意，有冇觸犯「港區國安法」，絕對值得商榷。
再進一步地去講，如果有攬炒派政客涉嫌違反「港區國安法」而被檢控，法庭除咗睇被告嘅言行，亦會睇埋成件事嘅脈絡，以及考慮被告嘅動機；關於呢一點，其實戴耀廷喺佢嘅《真攬炒十步》文章已經寫晒出嚟，其中包括否決預算案令政府停擺、香港社會出現街頭抗爭同血腥鎮壓，之後要引發西方國家對中國實施制裁，繼而「攬着中共一起跳出懸崖」，之後嘅事，戴耀廷仲稱係「超出香港界線」、「不能預見的」。將攬炒派35+計劃，同埋戴耀廷嘅《真攬炒十步》擺埋嚟一齊睇，其實似係想撼動甚至顛覆政權！
戴耀廷由明轉暗
戴耀廷煽動他人抗爭嘅套路，萬變不離其宗，只係因為「港區國安法」，而將本身「畫公仔畫出腸」嘅嘢，講得比較隱晦啲咁解，最終目的，大家都心照不宣。囍雨好奇，戴耀廷之前唔係好堅決咁公布要減少包括攬炒派初選嘅工作，要多啲專注喺學術咩？原來所謂專注學術，就係用學術嘅外衣去「合理化」攬炒工作？睇嚟無論社會點變，戴耀廷「反動之心，始終不變」。
原圖：中央社
請Follow我們的YouTube頻道：
下載我們的手機應用程式，收看第一手精彩內容：
評論