噚日係元朗7.21事件一周年，7.21作為攬炒派、反政府人士經常宣之於口、用以攻擊政府同警察嘅一件事，攬炒派政客當然唔會放過呢個機會，點都要出嚟抽抽「政治水」啦；所以，民主黨立法會議員尹兆堅、胡志偉同林卓廷就聯同7.21嘅「受襲者」喺噚日下午喺元朗開「記者會」，結果記者會未開，就被警察票控違反「限聚令」。囍雨真心唔明，噚日現場出現衝突嘅風險極高，民主黨做咩仲要去開記者會呢？
 
連衝突、疫情都不理
 
根據過去一年嘅黑暴運動「軌跡」，每逢有集會、遊行（好多時仲要係未經批准），示威者同警方出現衝突甚至流血嘅風險都幾高下，喺呢個情況底下，點解民主黨仲要特登喺呢個日子去番元朗搞記者會呢？而胡志偉係九龍東嘅立法會議員，做乜又要山長水遠去到元朗做政治騷？
 
更嚴重的問題係，自從7月以嚟，香港開始爆發本土感染個案，至今已經有超過700宗本土感染個案，任何聚會包括記者會、集會同遊行，都可能有病毒傳播嘅風險，胡志偉、尹兆堅同林卓廷，到底有冇防疫意識？係咪為咗做政治騷，就連抗疫都唔駛理？講到底，囍雨覺得佢哋明知有衝突風險，明知有病毒傳播風險，都要出嚟開「記者會」，極可能就係為咗選舉，為咗宣傳自己！
 
溫和派要變抗爭派
 
大家可能會好奇，點解民主黨咁多立法會議員，偏偏係胡志偉、尹兆堅同林卓廷出嚟開記者會呢？囍雨喺度提提大家，胡志偉、尹兆堅同林卓廷，都係喺所謂「民主派初選」中嘅「低票入閘」嘅人士，當中胡志偉雖然係黨主席，但佢喺九龍東直頭係「尾席入圍」；所以，囍雨估計呢三個「和理非」或者「溫和派」知道自己「危危乎」，就開始玩「變身」，想將自己變成「抗爭派」，向攬炒派支持者交代，甚至為九月嘅選舉打算。
 
不過調返轉，民主黨除咗極少數立法會議員，基本上都係「和理非」政客，依家為咗宣傳或選舉，個個都好似好勇武咁走出嚟，會唔會變成既唔係溫和派，人哋又唔覺得佢哋係抗爭派，「兩面不是人」呢？有句說話叫「奸有奸輸」，胡、尹、林呢個時候先出嚟做騷同抽政治水，係咪「好事」，尚未可知也！
 
胡志偉擬參選立法會九龍東選舉，已報名參選九龍東的人士有工聯會鄧家彪、民建聯黎榮浩、黃之鋒、人民力量譚得志和公民黨譚文豪；民主黨尹兆堅擬參選立法會新界西選舉，已報名參選新界西的人士有民建聯陳恒鑌、民建聯周浩鼎、工聯會麥美娟、公民黨郭家麒和熱血公民鄭松泰；林卓廷擬參選立法會新界東選舉，已報名參選新界東的人士有民建聯陳克勤、民建聯葛珮帆、林克霖、陳玉娥、熱血公民黃兆健、劉頴匡、何桂藍、人民力量陳志全和公民黨楊岳橋。

原圖：大公報

請Follow我們的YouTube頻道：

https://bit.ly/2kgU8qg

https://www.speakout.hk/app