之前啱啱先講完想「多休息、多專注學術」嘅民主派初選搞手戴耀廷，繼續「只退不休」，廣男今日見佢喺《生果報》又發表咗篇題為《初選就是抗爭》嘅文章，主旨意思大抵有兩個，一係用佢嘅語言偽術教大家「抗爭」，二係宣揚要建立所謂「平衡體制」。單睇字面，大家可能未必知佢意圖，但如果廣男話俾大家知，戴耀廷依家講咁多，其實都同佢嘅「真攬炒十步」一脈相承，大家就好容易睇穿佢「葫蘆裡面賣緊咩藥」。
請戴耀廷不要兜嚟兜去
講真，廣男睇完成篇文章，其實最大嘅感覺係戴耀廷講乜都淨係講一半。例如佢話「抗爭有不少同義詞」，包括「異議」、「不同意」、「不合作」、「戰鬥」…，即係點呢？唔該唔好喺度扮文縐縐喇！不如直接啲，係咪想講需要有人繼續「戰鬥、做炮灰」？抑或又想煽動抗爭又驚「踩界」啊？
又例如，「在不同的官方體制外，在民間建立起相對應的平行體制…難以指其違法」、「初選就是這樣的一種平行體制」、「建立起一個又一個平行體制…可以為最終要來的改變，先行奠下穩固的基礎」等等，廣男又要請教下，戴耀廷其實係咪意欲為初選「漂白」、想話初選唔違法呢？但廣男要問三個問題：所謂喺官方體制外建立平行體制，係咪想講「顛覆」？最終又想改變啲乜？仲有，如果真心認為初選唔違法，點解戴耀廷、區諾軒以及趙家賢呢啲核心搞手要一個一個接住縮沙呢？尤其初選作為「真攬炒十步」部署嘅第一步，不如戴耀廷直接話「真攬炒都不違法」好過喇！
初選係「真攬炒十步」第一步！
點解廣男話「初選」係真攬炒第一步？要理解呢個問題，大家應該先睇下戴耀廷自己講過啲乜。佢今年四月就已經清清楚楚寫出嚟，「第一步（2020年7至8月）。政府廣泛取消民主派人士參選立法會資格，包括現任議員。民主派由Plan B繼續參選。」廣男俾大家兩個參考標準，第一，時間吻合；第二，選出一班激進攬炒派取代傳統泛民，行動吻合。斷估戴耀廷都冇得再話呢啲係「學術研究」吧？！
如果唔知戴耀廷「真攬炒十步」嘅市民可能會問，初選係第一步，咁之後呢？嗱，按照戴耀廷嘅部署，簡單嚟講，之後嘅攬炒時間表同路線圖就包括「政府向立法會提出的所有撥款申請都被立法會否決」（第四步），「立法會再次否決《財政預算案》，特首辭職及特區政府停擺」（第七步），之後仲有「香港進入緊急狀態、解散立法會、血腥鎮壓，港人三罷、西方制裁」等等；甚至「十步之外」，仲有 「攬着中共一起跳出懸崖、香港新開始」，臨尾戴耀廷仲叫人「來吧！加入這抗爭」，講到咁，戴耀廷攬炒香港、顛覆政權嘅意圖，係咪已經昭然若揭呢？
戴耀廷涉違「港區國安法」
既然戴耀廷依家就講到明「初選就是抗爭」，廣男亦都唔怕直接講，即係話，戴耀廷以攬炒、顛覆為目的嘅部署，唔單止有意圖，而且已經有行動，咁請問大家，呢啲嘅言行係咪已經有觸犯「港區國安法」之嫌呢？廣男認為，操弄35+嘅初選，最終目的係攬炒或者撼動政權，可能違反國安法入面第二十二條第3款：「嚴重干擾、阻撓、破壞中華人民共和國中央政權機關或者香港特別行政區政權機關依法履行職能」。
真心講，之前戴耀廷話自己「要多休息、專注學術」，廣男已經相當質疑，佢根本就係把口講「退」，實則繼續「指手劃腳」。既然係咁，廣男呼籲所有市民都睇清楚戴耀廷呢啲文章、睇清楚「民主派初選」嘅本質，因為將來，呢啲隨時都可能成為佢嘅罪證！
請Follow我們的YouTube頻道：
下載我們的手機應用程式，收看第一手精彩內容：
評論