日前喺一個報章入面，教育局局長楊潤雄承諾會加強國安教育，嚴格要求學校跟從訓輔機制，對於不斷出現教師有違專業操守，甚至散播仇恨言論嘅問題，囍雨想問下教育局，如果有教師喺課堂內外向學生灌輸反對維護國家安全嘅歪理，或者將「港區國安法」妖魔化，如果查證屬實，教育局會唔會公開涉事學校名稱，等家長有所防範呢？如果家長、外界對邊啲學校嘅教師有問題「完全唔知」，咁對學生、家長又係咪公道呢？
「問題」學校名單應公諸於世
囍雨就喺度諗，公開「問題」學校名單，情況就好似公開新冠肺炎患者去過邊啲地方一樣，例如有患者去過咩商場、食肆、工商住大廈等等，外界要知道邊度「出過事」，先知道點樣避開病毒；同理，如果有學校出現「問題」教師，家長、外界都應該要知道，有所防範。否則，如果有教師向學生灌輸「反國安」及「港獨」等歪理，煽動學生們要「抗爭」，而家長又唔知道，學生們分分鐘變咗做「衝衝子」！
對於呢個問題，囍雨必須指出，公開涉事學校名單，至少有兩大好處，第一就係起阻嚇作用，令教師知道佢哋嘅行為、學校名稱可能會公諸於世，警戒佢哋「唔好亂嚟」；大家諗下，上年戴健暉、賴得鐘發表仇警言論嘅事件震驚全城，但往後依然出現有違專業操守嘅失德教師，如果阻嚇力足夠，絕對可以杜絕啲教師再亂嚟，唔會好似依家咁，「問題」教師仍然不時出現，但教育局嘅行動，就只係「譴責」同「警告」。至於第二個好處，當然係俾公眾知悉「問題」學校嘅名單，如果家長知悉子女所讀學校有教師「反國安」、有操守問題，係用家長身份向學校施壓，定係要為子女轉校避開「抗爭派教師」，家長亦有選擇權。
幼園到大學 都「有問題」！
黑暴運動持續一年有多，教育界嘅問題就完全表露晒出嚟，由幼稚園、小學、中學到大學，由出版社到考評局，近乎每種機構都有唔同問題，散播仇警訊息嘅有，歪曲中國歷史嘅都有。歸根究柢，就係因為過往嘅管理太鬆散，就算出現失德教師，都係輕輕罰下就算；教育管唔好，青年亦唔會管好，教育局所面對嘅係教育界積累多年嘅問題，好應該「落重藥」，嘗試用不同方法糾正教育界嘅歪風。
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論