攬炒派，可能係世界上最自相矛盾嘅動物，佢哋提出所謂立法會「35+」行動，其用意擺明就係要透過否決政府議案、財政撥款嚟脅逼港府甚至中央，但到人哋問佢係咪想干擾、破壞政權機關履行職能，即係違反「港區國安法」時，佢哋「十居其九」都會龜縮；好似民主黨主席、立法會議員胡志偉咁，竟然話《基本法》賦予權力否決財政預算案，講到否決預算案係得到《基本法》授權咁，廣男首先想質疑，《基本法》係點寫嘅呢？
看清《基本法》 勿信攬炒派
要引證胡志偉嘅講法，一個最簡單嘅講法，就係睇下《基本法》到底點寫，根據《基本法》第52條，立法會議員係可以「拒絕通過財政預算案」，但第73條寫明，香港特區嘅立法會職權包括「根據政府的提案，審核、通過財政預算」，從字面睇，即係審核並通過預算案係立法會職責，胡志偉講《基本法》，似乎只係講對攬炒派有利嘅條文。
喺政府財政議案或者財政預算案，攬炒派可以投反對票，但咁係咪代表攬炒派可以任意否決呢？廣男就覺得，如果攬炒派睇勻成個財政預算案，認為預算案「好有問題」，佢哋要投反對票，其他人阻止唔到佢哋；但問題在於，距離政府公布新一份財政預算案嘅時間差唔多仲有半年，依家連少少內容都未有，攬炒派連預算案內容都未知就話要否決，所為何事？
說到底 就是要謀殺香港！
講到底，其實攬炒派根本唔係要做咩監察或者審核，佢哋由始至終，都係諗住要透過「35+」、聲言否決財政預算案嚟脅逼政府，套用戴耀廷《真攬炒十步》嘅部署，就係「立法會否決政府《財政預算案》，特首解散立法會，並以臨時撥款方式維持政府運作」，繼而引發激烈抗爭同「血腥」鎮壓，最終促使西方國家「制裁」中國。簡單嚟講，就係要香港「死」，胡志偉作為「和理非」大黨主席，跟隨抗爭派玩攬炒，仲要喺度偽裝咩《基本法》賦權否決財政預算案，如果民主黨真係咁有膽量，不如直接承認自己要攬炒議會同香港仲好啦！
曾經有人講過，誰「忘本」，誰「就亡」，呢一年民主黨由「和理非」大黨逐漸靠攏抗爭派，俾抗爭派牽着鼻子走，廣男認為民主黨連原則、定位都忘記，大家不如睇下，民主黨未來嘅議席，會唔會繼續萎縮，直至「消亡」。
胡志偉擬參選立法會九龍東選舉，該區已報名參選的有鄧家彪及黃之鋒，另外黎榮浩和譚得志已宣布參選。
圖片來源：文匯報
請Follow我們的YouTube頻道：
下載我們的手機應用程式，收看第一手精彩內容：
評論