「港區國安法」實施之後，「好想走」但又走唔到嘅壹傳媒老闆黎智英，依家似乎「剩低把口」，其所謂嘅「抗爭」，變成時不時發表一啲歪理文章，大肆攻訐、抹黑政府以至政權。例如日前黎智英喺《生果報》又有篇題為《時間就是武器》嘅文章，不過今次有啲不同，單睇標題，大家未必知道黎智英想講乜，不過知其套路者大概都估到，佢嚟嚟去去離唔開三樣嘢：抹黑國安法、販賣恐懼、幫攬炒派催谷「35+」。今次，亦都毫不例外。
黎智英想講什麼？
講到抹黑、攻訐、販賣恐懼，黎智英同其他攬炒派政客一樣，最「叻」嘅就是有理無理都推到極致。例如今次篇文章又聲稱「國安法無法無天…身上藏有港獨標語的人，都有可能被押上大陸終身監禁」、「我不相信做生意的人，沒有了法治保障還會戀棧這地方，香港的國際金融中心地位還可以保留得住」；又例如「不相信美國等西方國家對中共的制裁會放緩…我更不相信中共對香港最後不會拉人封艇」等等；再講落去，開始到戲肉，諸如「小不忍則亂大謀」、「議會的鬥爭是『自己香港自己救』的新版本行動…最緊要進入議會鬥爭」、「對九月立法會選舉我們絕不能掉以輕心」云云。
單係睇呢啲，大家有咩感覺？囍雨就話，前面一大堆都係舖墊；立法會選舉先至係醉翁之意。但其中有幾個問題，囍雨喺度要請大家斟酌一下。
日日販賣「被送中」 黎智英仲咁安樂？
首先，究竟誰人無法無天？唔正正係持續一年嘅黑暴運動、暴徒殺人放火、打砸搶燒咩？囍雨現時同屋企人、朋友、同行傾開偈，都總有人成日講一句：「香港今時今日有國安法，真是多得黑暴唔少！」至於執法問題，黎智英以至攬炒派成日販賣「被送中」，老實講，囍雨次次聽就次次笑，就以黎智英為例，日日話香港已經冇呢樣自由果樣人權嘅人，但就日日享用住「一國兩制」下嘅自由罵政府、罵政權，論意圖、論行動、論證據，似乎樣樣都比一條「標語」確鑿得多喎，又唔見「被送中」？黎智英之前涉嫌嘅種種罪名，點解依舊喺香港法庭審理呢？
國安法「無法無天」？英美都有國安法！
再者，香港因為有咗國安法就「沒有法治」嘅講法，其實好笑多過好嬲，如果唔俾人顛覆、分裂國家，不允許人搞港獨就係「沒有法治」，咁英國都有國安法，黎智英嘅「主子」美國至少有20條咁多，咁究竟英美係有法治？定係比香港「更冇法治」呢？當然，作為舖墊嘅前戲，無需邏輯亦無需道理，散播仇恨、渲染恐中仇中先係目的，如果唔係點幫激進攬炒派「谷」35+？！但大家必須問下黎智英，所謂「不能掉以輕心」，何解？「小不忍則亂大謀」，「大謀」又係乜？係想搞分裂定係搞顛覆？請黎智英一定要講清楚，否則，「睇黎智英頭」嘅手足究竟係「抗爭」好定係「縮」好？更何況，最後會唔會又係好似去年區選咁，手足送咗又一批政客入去議會，但結果自己就做咗送頭嘅傻仔？
原圖：中通社
請Follow我們的YouTube頻道：
下載我們的手機應用程式，收看第一手精彩內容：
評論