呢一邊廂，攬炒派宣布所謂「民主派初選」取得重大成功，但另一邊廂，有份統籌初選嘅前立法會議員區諾軒，就宣布退出初選一切工作，強調自己「參與合法政治活動是可付出的極限」，囍雨好奇，咁樣係因為「兩辦」（港澳辦、中聯辦）都相繼指控初選，定係佢自己其實都覺得初選可能違法呢？區諾軒應該諗下，如果初選真係有違法，佢已經有份統籌咗初選嘅最重要部分，有刑責的話，佢又點會「走得甩」？
既然合法 為何退出？
首先，根據攬炒派嘅說法，佢哋一直強調初選合法，甚至有人稱「有建制派都話初選合法」，如果係合法，區諾軒其實絕對無需要退出初選；若然話因為「兩辦」發聲所以退出，咁係咪代表區諾軒自己心入面都無譜，唔肯定自己所作所為有冇「踩界」呢？又或者，會唔會因為有傳媒近日提起戴耀廷嘅「攬炒十步」（與中央攬炒，引外國制裁），令區諾軒都感覺到戴耀廷以至其他攬炒派真係圖謀不軌？
不論區諾軒有咩諗法，囍雨都想指出，如果初選真係有違「港區國安法」，講真區諾軒依家退出都無用喎！大家諗下，初選、「35+」作為攬炒議會甚至政府嘅一個行動，最重要嘅部分，就係透過搞「民間投票」選出代表攬炒派參選嘅政客，而呢一個最重要部分，區諾軒明顯已經有份參與，就算依家公開退出，囍雨睇唔到區諾軒有「卸去」責任嘅可能！
要抗爭 就要懂得「龜縮」？
喺網上面，囍雨見到評論區諾軒退出一事嘅評語相當兩極，有支持者認為區諾軒已經付出唔少，所以對佢表示「感謝」；但有較為激進嘅網民，就直言依家人哋一話犯法就退出，咁點抗爭呢？其實呢啲網民嘅說法，亦正好說明咗絕大部分攬炒派嘅本質，安全嘅情況下，佢哋當然會「去到盡」，但如果可能「有危險」呢？佢哋「龜縮」嘅速度，可以話係「快疾無倫」，但囍雨只想講一句，若然怕違法，最好就係唔好做踩界嘢。
初選之後，區諾軒打響咗「縮沙」第一炮，唔知之後仲有邊個會「縮」呢？執筆之時，囍雨睇新聞見到資訊科技界立法會議員莫乃光決定退落嚟，不再競逐資訊科技界功能組別議席，將機會留俾年輕人；囍雨好奇，唔知佢唔選同佢之前去過美國「勾結外力」有冇關係呢？喺「港區國安法」嘅強大震懾力下，聰明政客會懂得退；愚蠢政客又會點呢？當然係繼續「送頭」啦！據報，初選另一統籌者趙家賢都宣佈退出初選協調工作，唔知下一個又會係邊個呢？
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論