新聞自由係乜嘢？按照一般人嘅理解，就係新聞機構、編採人員以至記者可以自由地採訪、報道，唔會受到干預或者打擊。不過，自從記協不斷縱暴、堅定地企喺攬炒派以至黑暴人士一邊之後，廣男就覺得，新聞自由，對於某啲組織而言，只係口號嚟嘅啫！最新例子，就係黃之鋒公開記者個人資料，煽動他人滋擾記者，身為「捍衛新聞自由」嘅記協，竟然唔出聲，點解嘅？記協如果真心維護新聞自由，唔該快啲出嚟譴責黃之鋒啦！
記協神隱 不譴責黃之鋒？
黃之鋒公開記者資料、「煽動」他人滋擾記者呢單嘢，廣男必須要講句，黃之鋒咁做極度無品，作為公眾人物，唔鍾意記者提問就玩「公審」、「起底」，既涉及違法，更加有打擊新聞自由之嫌。據報，另一新聞工作者組織「香港新聞工作者聯會」已經發聲譴責黃之鋒，廣男想問下，記協喺邊？避疫「放緊假」呀？
為咗睇下記協對呢件事有咩回應，廣男特意上記協嘅官方網站，結果不論係睇佢嘅聲明定係新聞稿，都唔見佢有評論過黃之鋒事件，係廣男睇漏，定係記協「靜靜雞」地回應咗而大家都唔覺？老實講，新聞自由呢樣嘢，絕對唔應該分顏色，但睇嚟喺記協眼中，只有黃營媒體有新聞自由，其他非黃營或者攬炒派媒體，「對唔住」，喺記協眼中，可能係無新聞自由嘅！
記協已成政治組織
如果記協已經唔係為新聞自由發聲，咁記協係咩組織呢？廣男就認為，經歷一年黑暴運動，經過記協嘅多番包庇、縱容，記協好明顯已經成為咗一個不折不扣嘅政治組織！佢哋嘅存在，表面上係捍衛新聞自由、新聞專業，實則呢？從佢哋嘅表現嚟睇，已經係攬炒派嘅一分子，政治先行係行動綱領，打擊異己，就係佢哋嘅「責任」！
所以呢，記協如果唔出嚟譴責黃之鋒，繼續玩包庇、縱容，唔該記協，乾脆承認自己係政治組織啦！所謂新聞自由，對記協嚟講，只係「宣傳口號」！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論