過去兩日，囍雨接連同大家探討民主派所謂「初選」嘅種種問題，例如可以重複投票、涉侵犯私隱、激進攬炒派一旦把持議會嘅災難性後果等等，今日，囍雨想再深一層，同大家探討下，呢場「初選」，究竟有冇涉嫌違法？其實一路睇住已經公布出嚟嘅「初選」結果，囍雨越有一種強烈感覺，就係戴耀廷呢班人搞呢個所謂「初選」，根本就好似一場圍標；講得直接啲，根本就好似幕後大台假借民意、「欽點」屬意之人，問題係咁做嘅目的，要圖謀啲乜？
戴耀廷的「攬炒十步」 有部署有行動
繼日前中聯辦嚴厲譴責「初選」之後，港澳辦噚日亦都發聲，直指「初選」嘅惡劣本質，係嚴重挑戰特區憲制秩序，干擾同破壞香港民主選舉制度，更加係公然挑釁《基本法》同「港區國安法」。對於兩辦發聲，戴耀廷班人梗係話「莫須有」、話「不合常理、不符事實」云云，既然咁講，囍雨又不妨同大家一齊回顧下咩係事實。
事實之一，就係大家都記得，戴耀廷喺今年四月尾就曾公開發表題為《真攬炒十步，這是香港宿命》嘅「攬炒大計」，其中講到明「35+」嘅目的，就係要否決財政預算案、迫使解散立法會及特首辭職、特區政府停擺，如果套用「港區國安法」條文，係咪已經屬於「嚴重干擾、阻撓、破壞特區政權機關依法履行職能」呢？
再睇落去，按照戴耀廷嘅謀劃，攬炒第八步，就係「人大常委宣佈香港進入緊急狀態，中央政府把國家安全法直接適用於香港，解散立法會、成立臨時立法會、下屆特首由協商產生，大舉拘押民主派領袖」；第九步更加血腥，「香港街頭抗爭更加激烈，鎮壓也非常血腥，港人發動三罷，令香港社會陷入停頓」；而第十步，就係「西方國家對中共實行政治及經濟制裁」。戴耀廷班人成日話自己做嘅嘢「合法」、「不是非法手段」，囍雨依家就請大家睇清楚，以上一步步嘅攬炒大計，基本上每一步都擺明有部署、有具體行動、有政治目的！係咪已經屬於明顯想顛覆政權、分裂國家呢？尤其喺篇文章結尾，戴耀廷仲要引用歌劇《孤星淚》名曲《Do you hear the people sing》其中一句「 Join in the fight, that will give you the right to be free！」，根本就係煽動緊「抗爭」，係咪咁都唔違法、唔算「非法手段」？！
有無外力介入？應該嚴正調查！
另一個問題，對於「初選」以至攬炒嘅「幕後大台」問題，其實大家心中有數，當然，一切指控都應該講求證據，所以囍雨認為最好嘅辦法，就係特區政府、執法機關應該嚴肅跟進、調查，之不過咁，如果查證有外國勢力介入民主派「初選」屬實，咁係咪可能已經涉嫌違反「港區國安法」第二十九條裡面所講嘅，勾結外力「對香港特區選舉進行操控、破壞並可能造成嚴重後果」呢？
仲有，囍雨請大家留意，初選有個「抗爭聲明」，亦都講到明將來要否決財政預算案；如果囍雨冇記錯，初選之前，戴耀廷就已經自行決定唔要求各參選人簽署「攬炒聲明」，囍雨想問，如果攬炒議會、癱瘓政府沒有問題，戴點解要退縮？至於攬炒派立法會議員，連當日投票反對《國歌法》都唔敢，又點解？如果「初選」真係冇問題，搞手之一嘅區諾軒點解今日又突然宣布要退出？再者，如果成件事真係好似戴耀廷班人講得咁「了無畏懼」，呢班人又點解唔繼續宣揚攬炒甚至企硬反對「港區國安法」？其實，答案已經不言而喻啦！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論