「港區國安法」震懾力驚人，唔少攬炒派政客趕喺法例實施前著草，前香港眾志核心成員羅冠聰就係其中之一。噚日，佢就再喺facebook發表一段「真情剖白」， 簡單嚟講，就係佢已經去到外國，要開始為人生嘅新階段籌謀，結尾仲祝願香港人平安咁話。但係廣男就諗，羅冠聰掉低班「手足」走佬，自己可以開展新嘅人生，其他人就冒住受傷、被捕、入獄嘅風險，留喺香港繼續做傻仔去「衝」，依家羅冠聰祝港人平安，聽落簡直就係講緊風涼話。
潛逃倫敦 做下訪問當抗爭？
唔知大家有無印象，其實羅冠聰之前一直唔敢講走咗去邊，依家謎底終於解開，佢走咗佬去英國倫敦，咁佢過去又做咗啲咩呢？根據佢自己嘅講法，原來就係匿埋喺公寓，每日接受唔同嘅訪問，打佢所謂嘅「國際戰線」，仲話要繼續講出「真相」。廣果想問吓羅冠聰，到底佢係講咩真相先？踢爆攬炒派黑幕？同外國勢力講黑暴分子嘅暴行？又有無講俾外國人士知，有人喺香港搞奪權、搞「港獨」、搞分裂國家？羅冠聰所謂嘅「真相」，究竟有幾多成係真？有幾多嘢係客觀？
羅冠聰著草之後，美其名自已係轉打「國際戰線」、「繼續抗爭」，但實際上，可能只係接吓訪問做、講下啲歪理、偏頗嘢，廣男就喺度諗，係咪咁就當交差呢？如果真係咁，羅冠聰嘅抗爭又真係好輕鬆喎！其實羅冠聰都幾醒啊，走佬果時，都不忘為自己戴光環；依家走出國際「抗爭」，大家諗下，日後如果外國針對中國或者香港有咩新動作，佢係咪又諗住統統入自己數、當自己功勞呢？如果係嘅話，佢又真係點都「無得輸」喎！
其他同路人 就在香港搵「生機」？
另一個問題，攬炒派政客「精甩尾」，離開香港定繼續留低都好，都已經為自己諗好晒後路，羅冠聰喺外國主力唱衰香港，其他「同路人」呢？好似前香港眾志秘書長黃之鋒同立法會議員朱凱廸等人，就食住個勢參與所謂嘅民主派「初選」，攞盡政治利益搵「生機」、搵「真銀」。咁睇嚟，佢哋嗰班支持者，甚至送頭嘅人，其實都真係好唔抵喇，犧牲自己，就幫政客上位，到頭來仲要俾羅冠聰講風涼話， 真係陰公。
圖片來源：中通社
請Follow我們的YouTube頻道：
下載我們的手機應用程式，收看第一手精彩內容：
評論