對於民主派號稱有60萬人參與嘅所謂「初選」，囍雨噚日就同大家探討過其中存在嘅種種問題，包括涉重複投票、涉侵犯私隱等等；唔夠一日時間，事件又有新發展，雖然執筆之時，搞手戴耀廷等人宣稱點票（電子+實質票）尚未全部完成，不過根據已經公佈嘅結果，大家可以明顯睇到一個趨勢，就係本土派似乎正式崛起！
先打倒傳統泛民 再取而代之
對於呢嘅趨勢，囍雨認為基本上屬於意料中事。想當初，一班「傳統泛民」為咗自己政治利益最大化，一路跟隨激進攬炒派、與暴力「同行」，既然有咁嘅「因」，可想而知今日嘅「果」，就必定係俾激進派一步步蠶食。囍雨今日見到亦有分析指出，激進攬炒派認為泛民喺議會內抗爭不力，亦清楚知道如果自己要有名有權有利，就必先打倒傳統泛民、然後取而代之。
當然，政局日後點發展，囍雨依家唔知，不過今日最想同大家深思嘅，係如果順住今日呢個「初選」結果，一旦九月立法會選舉，真係激進攬炒勢力攞到35+（甚至N+都好），香港又會變成點？
攬炒派「35+」的災難
如果大家有留意「初選」嘅所謂「共同綱領」或者協議，其實擺到明嘅一點，就係日後當選者要「承諾」否決政府預算案（其實基本上就係逢政府必反）；講得再白啲，呢班人爭住要選立法會議員，目的就係將激進攬炒帶入議會，癱瘓政府、攬炒香港。其他法例法案先唔講，大家諗下，如果真係否決預算案，香港會點？最受影響嘅，例如政府運作開支、教育開支、所有以公帑支撐嘅福利，可能統統出問題，大家諗下，成個香港係咪就咁癱瘓算數呢？
咁啱囍雨見到立法會內會主席李慧琼噚日亦都發表咗一份「內會年結」，講到「四大遺憾」，其中就提到截至7月9號，今個會期只通過咗17項法案，與上屆最後一個會期通過29項法案相比，明顯大幅減少。其實大家回顧過去一年，眼白白睇住時間一日一日浪費，但與民生、經濟息息相關嘅法例法案，就一個一個「胎死腹中」…咁以後呢？大家不如又諗下，當激進攬炒勢力真係把持議會大多數嘅時候，先唔好講任何「福利」，囍雨相信，恐怕香港發展都隨時「熄燈、冚旗」，最後遭殃嘅會係邊個？咪廣大市民、你同我囉！
所謂「本土派、抗爭派」，其實講得白啲，就係以偏激取代温和、以更偏激取代偏激，不過唔係為建設，而是要攬炒，咁嘅政治目的以至以此為目的嘅所謂「初選」，究竟有冇違反香港法律甚至「港區國安法」？囍雨認為，當局真係有必要嚴肅跟進一下、調查一下，市民大眾都要睇真啲、諗真啲！唔通，真係睇住有人「搞死」香港仲要見死不救咩？！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論