攬炒派鼓動人「以身試法」嘅時候，有一條萬能Key，就係「自由」。當佢哋要煽動人上街抗爭嘅時候，會話俾人聽呢啲係集會、示威自由；而當佢哋想人繼續「播獨」時，佢哋就會將某啲政治口號同言論自由「拉上等號」，當中「光復香港 時代革命」就係一個好例子。但大家要小心一樣嘢，萬一錯信攬炒派政客要被捕、被檢控時，要負上刑責嘅唔係啲政客，而係大家。
「光時」口號的由來
要討論一句政治口號係咪有「港獨」意味，最好嘅方法當然係睇下句口號點嚟，同埋啲人點用佢啦。呢句由前本土民主前線發言人梁天琦先使用嘅口號，其實梁天琦等人擺明就係鼓吹「港獨」，曾表明過要「以武制暴」，更講過「獨立」係唯一出路；喺2016年8月一個幫香港民族黨站台嘅活動上，梁天琦更喺「香港港獨」嘅佈景板前三次高呼「光復香港 時代革命」，呢句口號喺去年黑暴運動時又再「興起」，而且有「港獨」宣傳品、口號「襯托」，如果話呢句口號無「港獨」意味，唔通真係好似某啲政客咁講，係關於要擁護好「一國兩制」咩？
至於叫「光復香港 時代革命」有冇犯法，囍雨先請大家睇下「港區國安法」入面關於分裂國家罪嘅條文，入面寫明任何人組織、策劃、實施或者參與實施旨在分裂國家、破壞國家統一行為嘅，不論有冇使用武力，即屬犯罪。按囍雨嘅理解，如果齋叫「光時」口號，有冇犯法攬炒派當然可以商榷，但若然係有人高叫「光時」口號時，同時身處一個反政府行動，現場又有人有所「行動」，從意圖、行為以至環境而言，就一定有罪嫌。所以攬炒派將口號同言論自由「掛勾」，擺明靠害！
為何攬炒派政客不說？
攬炒派政客嘅言行，永遠都會令大眾知道條法律界線去到邊度，黑暴運動期間，大家唔會見到攬炒派政客去衝，都會估到邊個衝，邊個就係「送頭」嘅傻仔；「港區國安法」實施後，攬炒派政客當然亦唔會叫「光時」口號，其他人叫，係其他人嘅事。喺呢度，囍雨要不厭其煩地講多次，「港區國安法」唔係無牙老虎，大家千祈唔好以身試法，成為攬炒派政客最想多啲人出嚟做嘅「傻仔」。
請Follow我們的YouTube頻道：
下載我們的手機應用程式，收看第一手精彩內容：
評論