幾個「流亡」海外或者台灣嘅反政府、反中央人士，包括喺台灣嘅林榮基、喺美國嘅梁繼平、喺德國嘅黃台仰同喺英國嘅鄭文傑，正式宣布發起「避風驛」組織，稱由於北京強推「國安法」，壓制異議，導致「兩制滅亡」，所以希望透過組織提供不同地方嘅「庇護政策訊息」予有需要人士。咪住先，「避風驛」？佢哋當中有啲人好似係逃犯嚟喎，似想搞「避罪驛」多啲！
逃犯扮英雄？
對於以上四人搞組織，當中梁繼平同黃台仰，佢哋係暴動案嘅逃犯嚟喎，兩個逃犯話因為「港區國安法」幫人避風，其實係咪想幫暴徒避罪呀？
先講梁繼平，呢個讀書好叻嘅港大畢業生，喺去年七月一日有份佔領、衝擊立法會，期間仲好「勇武」地除下口罩，稱「如果撤離就會變成傳媒口中嘅暴徒」、「一齊佔領立法會，人越多就越安全」同「一世只有一次嘅機會、已經冇回頭路」等等，煽動其他人繼續佔領立法會，之後潛逃到美國；至於黃台仰，更被視為係旺角暴動案嘅「主犯」，曾經揚言「寧為玉碎，不作瓦全」，不過最後就走咗去德國申請難民庇護。與其話呢班人幫人「避風」，講得明白啲，似幫人著草多啲！
犯罪與被逼害 是兩回事
喺呢度，廣男想大家搞清楚兩個概念，有人涉嫌犯罪而潛逃，係逃犯；有人無犯罪而被捕、被告甚至入獄，先同被逼害而「流亡」有關係。縱觀依家潛逃到美國、台灣以至德國等嘅人士，好多都係喺香港涉嫌犯罪而潛逃，唔係咩被逼流亡，而係畏罪潛逃先真。所以所謂「避風驛」，亦唔係咩伸張正義嘅組織，而極可能只係協助逃犯嘅組織。
話時話，梁繼平、黃台仰，唔知佢哋有冇掛住香港呢？如果有，不如返嚟承擔責任啦，「流亡」海外，好受咩？選擇逃避，結果就係一生內心都要不安、受盡煎熬；再者，佢哋自己作為過來人，都知道逃亡在外係一啲都唔好受，依家鼓勵或者幫助其他人效法佢哋，係咪想更多人同佢哋一樣「有家歸不得」呢？
原圖：rthk、文匯報
請Follow我們的YouTube頻道：
下載我們的手機應用程式，收看第一手精彩內容：
評論