呢兩日廣男睇新聞，見到有單新聞話攬炒派擔心依家市民反應冷淡，最終會令參與初選投票嘅人數好少。廣男就覺得，人多人少，係攬炒派自己嘅問題，廣男反而關心一班參與初選嘅人，喺「港區國安法」立法前就有共識要攬炒議會，又會唔會有違反「港區國安法」之嫌呢？

沒有公平選舉？

攬炒派舉行史無前例嘅大規模初選，遊戲規則係邊個勝出就可以參選，輸咗就唔可以參與九月嘅立法會換屆選舉，廣男真心想問，咁樣會唔會影響到選舉嘅公平、公正同誠實嘅選舉原則？好似到目前為止，都無見到選管會對攬炒派初選有咩回應？

更值得大家留意嘅一點係，如果大家有睇過「港區國安法」嘅文稿，喺顛覆國家政權罪果部分，任何人組織、策劃、實施或者參與實施以下以武力、威脅使用武力或者其他非法手段，旨在顛覆國家政權，而去嚴重干擾、阻撓、破壞中華人民共和國中央政權機關或者香港特別行政區政權機關依法履行職能，即屬犯罪；一班參與初選嘅攬炒派，之前已經有共識要否決政府財政預算案，即係攬炒議會，阻撓政權機關履行職能，佢哋會唔會係打算集體違反「港區國安法」呢？

「35+」議會即癱瘓

對於攬炒派嘅初選，廣男仲諗到一點，熟悉選舉運作嘅人士，都知道由某位人士宣布會參選果一刻開始，基本上一切宣傳都要計入選舉開支，依家一班攬炒派都宣布會參選，而且有個初選平台俾佢哋去宣傳自己甚至打擊對手，咁今次初選嘅開支，到底會唔會計入各個參與初選嘅攬炒派嘅選舉開支度呢？如果計算在內，戴耀廷等人諗住點計？如果唔計，係咪又已經犯咗法？

所以講起呢個攬炒派初選，廣男可以用一句「問題多多」嚟概括，因為除咗咁做可能有違選舉公平、變集體「圍標」之外，呢個初選或者攬炒派嘅共識有冇犯法都未知！最最重要嘅一點係，佢哋成日話要爭取「35+」，如果俾佢哋「成功爭取」，咪成個議會陷入癱瘓，到時咪連社會福利金、政府派錢紓困都唔得？諗到呢度，只能講句，攬炒派「35+」，可能只係有害而無利嘅攬炒行動。 

圖片來源：RTHK

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk