「港區國安法」條文尚未正式公布之前，香港眾志已經宣布解散，核心成員黃之鋒亦都第一時間話退出組織；呢幾日，當大家都好奇，眾志另一核心成員羅冠聰點解唔見影時，噚日，羅冠聰就喺facebook留低一段冠冕堂皇嘅「剖白」，其實就係同大家講：我也退了；至於去邊？唔好意思，唔話你知！
睇羅冠聰成篇貼文，講到自己「走出國際」咁偉大，咁佢究竟準備去做啲咩呢？羅冠聰就話，必須要有「國際視野的政治人物」，喺民間外交層面以港人的身份發聲，所以佢就「決志承擔呢種責任…」囍雨真係想講，嘩！即係當自己係「具有國際視野的政治人物」？連走佬都講到咁「高風亮節、清新脫俗」，都真係少有囉。
不過講到「國際視野」，羅冠聰又的確幾「醒」嘅，大家諗下，當初美國疫情大爆發，羅冠聰就即刻返嚟香港避疫；依家國安法之下，就一邊叫住「香港人的抗爭是不會止息」之餘，自己又第一時間神秘閃人走咗去，仲好意思講到自己「決定好艱難」咁款？！囍雨又想問下，對於呢種彈出又彈入、淨係優先諗住保自己嘅政客，你會信佢積極幫香港人「抗爭」？！囍雨就真係好懷疑喇！
好行夾唔送 自求多福吧
咁羅冠聰打算幾時再返嚟？嗱，佢就同大家講，「今此一別，尚未知歸途何期」、「願他朝有幸，半生歸來」…既然係咁，囍雨都真係要同羅冠聰講句：好行夾唔送，兼好好保重啦！因為唔知羅冠聰依家身處嘅地方，疫情嚴唔嚴重呢？又或者，如果做咗啲涉嫌違法嘅嘢，人哋嘅法律會唔會仲辣過香港呢？就當呢兩樣都唔係問題，都唔知會唔會有種族歧視呢？羅冠聰真係要自求多福。囍雨就喺度諗，日後佢喺身處嘅地方萬一「有咩事」上嚟，又會唔會諗下香港、還是覺得你最好呢？
香港的繁華璀燦 你冇份建設
至於佢講到「從飛機望下香港的繁華璀燦，是我心目難以忘懷的一幀剪影」時，囍雨想講，唔好意思，香港嘅繁華璀燦，你冇份建設，不過有份攬炒破壞；香港有今日嘅成績，唔係你「革命」嘅成果，而係你父母果一代，甚至好幾代前人辛勤耕耘嘅果實。要走，就唔好扮偉大扮情深，囍雨認真講句：有啲嘢，你冇失去過，係唔會知道珍惜嘅！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論