一名已經獲得美國大學錄取嘅17歲應屆文憑試考生，因為參與舊年十月一次黑暴運動並身攜三枚汽油彈，日前被法庭判囚兩年八個月。同以往同類案件相似，今次案件嘅主角，亦都正值人生大好年華，甚至有個大好前程（獲美國嘅大學錄取），如果大家有印象，以往囍雨總會對呢類故事深感惋惜、痛心，不過今次，囍雨嘅諗法有啲唔同；有人話，32個月嘅刑期，判得「太重」，囍雨反而想講，被告或者應該覺得慶幸。點解咁講？大家不妨同囍雨一齊睇落去…
守法意識薄弱的青年
今次案情最先引起囍雨關注嘅地方，係心理學家關於被告嘅評估。心理報告認為，被告守法意識薄弱，且深受社交媒體影響；因為唔認同警方執法，就去學製造汽油彈「對抗警方」，重點係，無諗過會有嚴重後果！大家認為，心理學家嘅分析，係咪顯示被告可能係一個易受外界影響、只要心有不滿就容易「走極端」嘅人呢？
囍雨就喺度諗，如果被告今次僥倖冇被警方截獲汽油彈、冇被捕冇面對刑責，咁下一次佢又會做出啲咩更加極端嘅事情？如果繼續受到偏頗資訊或者其他人嘅煽惑，佢內心嘅不滿甚至仇恨情緒，又會將佢扭曲成點樣嘅人格？囍雨睇案情，感覺被告唔係一時「行差踏錯」，而係差一啲就鑄成大錯。係，32個月嘅監禁，的確唔短，但請呢位後生仔諗下、請大家諗下，如果任由佢繼續錯落去，日後面對嘅制裁，恐怕更嚴厲。
不要忽視偏頗資訊的禍害
囍雨由此關注嘅另一個問題，係社交媒體對被告心理嘅影響。當然，呢一刻，我哋唔知道被告因為聽咗乜睇咗乜而走上違法道路，亦都唔知道係邊個媒體、平台影響佢最深，但鐵一般嘅事實再次警醒社會，千祈唔好忽視媒體、尤其係立場偏頗嘅資訊，對年輕人嘅影響。
今次案件再次話俾我哋知，外界環境，對原本白紙一張嘅青少年，係可以有好深遠嘅影響；再進一步，或者大家應該反思，喺我哋嘅言論自由社會，教育出咗咩問題？高度發達、流通嘅資訊，我哋嘅傳媒出咗咩問題？喺引導青少年成長嘅過程中，我哋嘅學校、老師甚至家長，又出咗咩問題？究竟有幾多幕後黑手，將我哋嘅大好青年塑造成滿心仇恨、易走極端嘅「怪獸」？
所以囍雨話，從另一個角度，17歲嘅被告或者應該慶幸，慶幸自己喺「仲有得救」時，被當頭棒喝「敲醒」；囍雨亦都衷心希望被告明白，面對問題、面對責任、真心改過，佢嘅前途、人生係有機會有「take two」嘅。但，我哋嘅社會呢？每一單同類案件，都不斷警醒大家，社會有某些部分「病了」，但仲要有幾多個「冰山一角」嘅代價，先足以促使社會認真去反省、改變，去撥亂反正？
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論