如果你問囍雨，攬炒派當中咩人「最有智慧」，囍雨諗都唔駛諗，會話俾你聽老一輩或者傳統嘅攬炒派政客，永遠係最叻嘅，年長少少嘅代表有李柱銘，「港區國安法」一傳出立法消息，佢就話「寧願要23條立法」，中間嘅年齡層代表戴耀廷，直頭話自己會「收聲」、「唔講踩界嘅嘢」，攬炒派立法會議員又如何呢？直頭連票都唔投，廢事「出事」，班後生嘅攬炒派或者本土派政客，完全「望塵莫及」。最近，李柱銘接受外媒專訪，直言「提倡攬炒嘅人，佢哋一無所知」，言下之意，係咪想講提倡同參與「35+」（爭取立法會議席過半繼而攬炒）嘅人，佢哋係無知、唔識嘢呢？
李柱銘的「精準」分析
引用一句廣告對白，今次李柱銘接受訪問嘅內容，可以話係「分析精準有層次」，囍雨覺得當中有三大要點非常值得大家「細味」，包括「提倡攬炒嘅人，佢哋一無所知」、「暴力做法適得其反」同埋「要求獨立會令香港失去國際嘅支持」，如果用一句話去概括李柱銘嘅說法，簡單嚟講就係其他攬炒派以至「港獨」派嘅抗爭路線行唔通囉！
暴力無作用 港獨無市場
坦白講，提倡攬炒嘅政客，佢哋似乎睇唔清一個事實，就係連佢哋嘅支持者都唔多支持佢哋嘅做法，最明顯嘅例子，就係佢哋早前搞所謂罷工公投，本來佢哋自己設定嘅門檻已經極低，但結果係投票嘅人連九千人都無，即係攬炒派想攬炒，但覺得「搵食要緊」嘅香港人「睬你都傻」。另一問題，就係所謂「勇武抗爭」，呢一年係無爭取過嘢，反而令到香港亂糟糟，搞到阿爺要出手制定「港區國安法」。最後，當然係有人爭取獨立，但國際間幾乎無人響應過呢種極端要求，如果以西班牙加泰隆尼亞嘅例子作為「前車」，「港獨」派再搞落去，分分鐘會「車毁人亡」。
如果叫囍雨去解讀李柱銘嘅一番言論，就係佢意指其他攬炒派策略錯、路線錯、做法亦錯，直頭係大巴大巴咁摑落其他攬炒派面上；有人會覺得李柱銘呢啲老一輩政客呢幾十年來「無所作為」，但掉番轉咁諗，起碼李柱銘等人曾經令政制向前行過一步，反政府行動亦無令人受過重傷甚至身亡。依家一班攬炒派玩到咁盡，玩到最後，一定係引火自焚。所以呢，識得玩，應該好似李柱銘咁，睇清楚時局形勢，知道底線喺邊，有啲咩係絕對唔可以做㗎！
請Follow我們的YouTube頻道：
下載我們的手機應用程式，收看第一手精彩內容：
評論