喺一套經典港產片入面，飾演華探長嘅劉德華喺廉政公署成立之前，決定舉家移民，仲同啲伙記講覺得政府「今次係認真」，叫啲「手足」不如都一齊走；結果劉德華成功「移民」，其他留喺香港嘅涉貪「手足」就一個又一個俾廉署拘捕。點解廣男突然之間喺度講港產片？因為當今日前政務司司長陳方安生表示自己年事已高，「會從公民及政治工作」退落嚟嘅時候，就令廣男諗起呢個港產片橋段，呢頭國家快將就「港區國安法」立法，未正式立完法陳方安生就話「退下來」，係咪咁啱呢？
喺呢度，廣男要同大家講番啲新聞，近期唔同嘅攬炒派政客嘅「古怪」言行，絕對唔係咩「單一事件」，例如陳方安生老友、《生果報》老闆黎智英，就算表明自己唔會離開香港，但佢接受訪問時都講明有準備安排家人「離開」，陳方安生另一老友李柱銘對於「港區國安法」，就坦言寧願要23條立法；近年攬炒派入面最出名嘅「冷氣軍師」戴耀廷，更表示法例通過後，如果無追溯力佢會「收聲」、「唔講踩界嘅嘢」。依家陳方安生喺呢個時候退落嚟，到底係因為自己年屆80要多啲陪伴家人，定係怕「港區國安法」令自己陷入危機，大家真係可以自行判斷。
港區國安法震懾力驚人
如果陳方安生真係因為「港區國安法」而「退下火線」，廣男又要講多次，「港區國安法」嘅震懾力實在驚人，不論係黎智英、李柱銘以至陳方安生，近年佢哋俾人印象就係好鍾意「搞局」，好鍾意對外唱衰香港；依家「港區國安法」都未正式立法，就即刻將佢哋收服，可以預料得到，如果「港區國安法」正式通過後，除咗一啲「唔識死」嘅攬炒派政客之外，聰明嘅政客，就算唔退落嚟，最少都唔再敢搞咩事，仲要快快洗底表態，最近攬炒派立法會議員喺立法會連反對票都唔敢投，就間接證明咗法例真係Work！
有一點值得大家留意嘅係，陳方安生喺呢個「退休」聲明入面，講到明「盼年輕人對前途保持希望，以守法與和平的方式繼續守護我們這個城市的核心價值」，言下之意，係咪叫人唔好再「勇武抗爭」呢？佢嘅講法同李柱銘嘅「暴力做法適得其反」如出一轍，咁可能代表老一輩攬炒派已經認定咗，暴力根本就無出路，同埋佢哋點解唔喺去年就同暴力「割席」？陳方安生、李柱銘都「立場急轉彎」，係咪同一向鼓吹「違法達義」、「攬炒十步」嘅戴耀廷「打對台」？攬炒派內部都非常矛盾下，但依家連陣營內重量級人馬都「縮」，真係相當有啟示！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論