噚日有社會人士搞咗個「反干預、撐國安立法論壇」，出席者包括全國政協副主席梁振英；席間，梁振英表明要做好說明工作，對青年人做、對學校做，因為唔敢保證反對派會唔會繼續煽惑恐懼和歪曲條文，凡係新嘅法律，社會都要做好說明工作。囍雨就覺得，現時唔少人都著眼於立法問題或者「港區國安法」嘅細節問題，其實社會最急切做嘅，就係做好說明、教育工作，唔好俾位攬炒派繼續煽動、荼毒年輕人。
國家隊對國家隊
對於噚晚嘅論壇，囍雨覺得精彩對話實在太多，但有幾點關於梁振英嘅分析，好值得分享，包括「國家隊」（中央）喺特殊情形要出面，因為有啲嘢係「特區隊」（特區）無經驗同人力物力應付；不論法律例有冇追溯力，一啲犯法行為係可以沿用現有法律去應對；反對派質疑對法官唔公道，隱含地指控受特首委任嘅法官有「偏頗」。囍雨覺得最重要嘅一點，當然係特區政府、社會人士要做好說明工作，唔好俾政客再煽動到青年同學生。
保護青年 免受荼毒
喺過去一段時間，除咗個別要參選、怕議席「受影響」嘅政客，攬炒派火力全開反對「港區國安法」，一時話法例將香港人「送中」，一時話罪行「模糊」，一時仲話法例係「以言入罪」；囍雨估計，即使「港區國安法」正式通過並成為香港法例，呢啲爭議一時之間係唔會平息，攬炒派就算唔會自己「以身試法」，都會同年輕人、學生講呢條係「惡法」，鼓動啲年輕人出嚟抗爭。結果會點？結果當然係好似過去一年嘅黑暴運動咁，政客「叫人衝，自己鬆」，最後就係一個又一個年輕人被捕、被檢控甚至入獄。
所以，喺未來一段日子，政府、各界人士都應該對社會同年輕人做好「港區國安法」嘅說明工作，喺媒體做、入學校做、搞活動、搞比賽等等，凡係可行嘅方法，都應該盡量教育好年輕人，等佢哋知道「港區國安法」嘅用心，亦明白自己唔可以被政客利用去抗爭。可能喺呢個過程，會有攬炒派「搞」支持「港區國安法」嘅人，甚至鼓勵外國制裁佢哋，但誠如梁振英所講，佢哋越咁做越唔怕，「為了香港大多數的福祉和利益，為了國家的利益，我們『唔驚』」。
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論