噚日政府喺立法會動議委任張舉能為終審法院首席法官，民主黨「自回歸首次對任命動議投棄權票」，同樣投棄權票嘅，仲有公民黨一眾議員（除咗郭榮鏗）、邵家臻同張超雄，廣男喺度諗，一個動議，正常立法會議員都有立場，民主黨、公民黨係咪已經覺得無人影響到佢哋「地位」，點都可以繼續安安穩穩享受議員嘅高薪厚祿，所以連票都唔駛投呢？佢哋咁做，又「對得住」喺議會外抗爭嘅「手足」咩？
一切皆陰謀 攬炒派棄權「自保」
對於點解一向唔會點有人反對嘅首席法官任命，今次會出現幾張反對票，而「和理非」代表民主黨同公民黨會投棄權票或者缺席呢？當中原因，就係因為網上以至攬炒派之間一直有傳言，稱張舉能個人較為「建制」，所以呢，今次就有攬炒派投反對票，怕事嘅民主黨同公民黨就棄權，但廣男唔明白，公民黨、民主黨嘅立場，到底係咩呢？
廣男估計，公民黨同民主黨之所以投棄權票，擺明喺度「擦邊球」，如果佢哋投贊成票，咁一定會得失要求「法官要夠黃」嘅支持者；如果投反對票呢，又怕俾人話佢哋想反對司法界嘅決定，所以就投棄權票或者唔出席會議。但廣男想問一句，攬炒派好，反對派也好，喺議會都有角色嘅，你哋啲「手足」喺出面「打生打死」，你哋呢班咁「錫身」嘅議員，連喺立法會投次票都唔敢，「衰仔」咗啲喎！
如果大家有印象，之前國歌法要三讀表決時，攬炒派除咗熱血公民鄭松泰，係無人投票㗎，有分析就指，攬炒派唔投票，係因為驚反對列喺《基本法》內關於國家嘅法例，之後再參選會俾人DQ（取消參選資格），所以最後只得一個攬炒派議員投票。廣男嘗試用攬炒派嘅支持者角度去睇呢啲棄權、唔投票事件，老實講，支持者投票俾攬炒派，多多少少都係想佢哋搞議會抗爭，依家佢哋連票都唔投或者投棄權票，即係唔做嘢、齋出糧？實在係可恥 …
繼續支持攬炒派 入議會「佛系抗爭」？
仲有唔夠三個月就係立法會換屆選舉，廣男就喺度諗，若果民主黨、公民黨呢啲政客可以順利連任，廣男相信、深信，佢哋可能會更加畏手畏尾，一「有事」就唔投票，最多最多，開完會行出嚟同記者講，「今日係香港民主最黑暗嘅一日」，不過黑暗之處，唔係因為政府依法辦事，而係「民主派」為保高薪厚職竟然不作為，真係「好黑暗」！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論