近日，有網媒播出一段英華書院學生高調地喺學校操場唱「獨歌」、高叫「香港獨立」口號嘅短片，片段一出街，各界即刻嘩然，嘩然之處，在於幾十個學生咁高調播「獨」，在場的學校教師甚至副校長竟然企埋一邊「食花生」？事後，校方回應指學生做法「絕不理想」、當日有教師曾「勸止不果」、學校會對涉事學生進行「校本訓輔」云云。囍雨剩係想問一句，所謂「訓輔工作」，包唔包括懲罰？定係回應完外界、訓斥下學生就算？
勸止學生？還是縱容學生？
據報，幾十個「英華仔」唱「獨歌」、高叫「港獨」口號前，校方係有教師喺佢哋播「獨」前「試圖阻止」，但所謂有片有真相，事實就係一班學生繼續播「獨」，過程仲一啲都唔短，涉事或者在場教師係咪上前「講幾句」，然後學生話要唱歌、播「獨」，佢哋就喺現場「乜都唔做」？呢種所謂勸止，老實講，好Hea喎！
另一個問題，囍雨唔係教育界人士，所以可能唔夠明白到底何謂「訓輔」工作？即係訓導、輔導？依家幾十個學生咁高調地違反咗教育局嘅指引，宣揚嘅內容更加係不符《基本法》、「一國兩制」，學校到底有冇懲罰過相關學生？如果無，咁個個都喺學校播「獨」然後被訓輔，又駛乜驚呢？再者，喺現場嘅副校長、教師，又有冇責任要負呢？
「播獨」只是「不理想」？
有評論質疑，到底涉事學校嘅副校長、教師係怕事，定係自己都支持「港獨」；校方聲稱反對任何鼓吹「港獨」嘅口號同言論，該校校長又指學生做法「絕不理想」，但對於「港獨」、播「獨」問題，囍雨就唔覺校方有清楚表明學校立場係反對「港獨」。校方代表嘅回應，同攬炒派回應記者問題時剩係話自己「不支持、不贊成」「港獨」，連反對「港獨」都唔敢講一聲，實在有「異曲同工」之妙。
所謂上樑不正下樑歪，連學校校長、教師都對「港獨」問題曖曖昧昧，咁學生有恃無恐地喺學校播「獨」，就變得理所當然。喺呢度，囍雨要追問多次，學校到底有冇實質懲處措施？校方代表包括校長同當日在場教師，到底係支持定係反對「港獨」呀？講清楚好喎！
圖片來源：網上影片截圖
請Follow我們的YouTube頻道：
下載我們的手機應用程式，收看第一手精彩內容：
評論