相信大家小時候，都聽過「狼來了」嘅故事，放羊嘅小朋友呃到村民第一次甚至第二次，都無可能呃到啲村民第三次，噚日民主黨立法會議員林卓廷、尹兆堅再度以「天下為公」名義，想借住「私人檢控」梁振英而發起第二次眾籌，囍雨認為網民反應已經「說明了一切」，有網民質疑佢哋「上次二百萬你班友隨咗遊山玩水仲做咗啲乜？」，有網民問佢哋「呃完錢未？」，亦有網民指自己上次捐完錢但林卓廷佢哋「半年乜update都無，好失望」。今次林卓廷又想借機向公眾籌錢，支持者「中過一次招」，相信都好難會再「落搭」。

先認清UGL真相

講開「天下為公」，林卓廷等人以「追究」UGL事件之名，針對全國政協副主席梁振英，囍雨認為絕對有必要喺度同大家Recap下相關事實；對於UGL事件，林卓廷等人成日話單嘢「有Case」，不過外國嘅執法機構例如英國嘅國家打擊犯罪調查局、嚴重詐騙局以至英國金融行為監管局，都表示過無足夠證據繼續查或者表明已經結案；澳洲方面，其執法機構亦無任何跟進行動。至於香港，廉政公署早已經結束調查，審查貪污舉報諮詢委員會主席鄧國斌更講過廉署已經不偏不倚地調查、「leave no stones unturned（翻遍每塊石頭）」。簡單嚟講，就係外國以至香港執法機構都認為唔駛再查或者唔會檢控，林卓廷等人話要籌錢提出私人檢控，到底係依法行事，定係政治炒作呢？囍雨相信大家心入面一定有答案。

囍雨喺呢度想提一個觀點，就係本港及英、澳調查部門掌握嘅係真實憑據同文件，佢哋都決定唔檢控，林卓廷等人應該睇吓佢地手持嘅「證據」，根本不足以提檢控，用法律用語就係所謂「傳聞證據」，市民更唔好被誤導。

極速花光眾籌款項 

本來林卓廷等人借炒作UGL事件而籌錢單嘢大家都差唔多唔記得，佢依家衝出嚟話要籌第二次錢，又令囍雨諗起之前提出嘅疑問。第一，佢哋之前籌咗200幾萬元，有20幾至30萬元用咗「飛去」英國、澳洲，點解要用咁多？林卓廷、尹兆堅變相變咗「免費旅行」，有人包佢哋機票、住宿，佢哋係咪要回水呢？第二，佢哋用喺拍攝宣傳片嘅開支，稱用咗13.5萬元，佢哋有冇搵自己人拍片，然後賺市民錢？第三，囍雨覺得最為關鍵嘅，就係佢哋之前最後一次講財政狀況時，「天下為公」嘅錢由大約70萬元一下跌到得番十幾萬元，林卓廷等人話係因為搵咗兩個資深大狀俾法律意見，果兩位資深大狀係咩人，係咪佢哋攬炒派用開嘅自己人，有冇私相授受？林卓廷等人公開財務狀況，係咪應該公開得仔細啲，等市民睇真啲呀？

囍雨上網睇網民留言，有網民話政府開始派錢紓困前林卓廷等人就眾籌，囍雨喺度諗，應該唔會有人想「食咗」市民本身可以落袋果一萬元呀？臨近立法會選舉，如果有人捐錢俾政客做政治騷，對政客而言，點計都無蝕，最多最多，咪用完啲錢，出咗一輪出鏡曝光之後，同啲支持者講聲Sorry，話自己盡咗力囉！攬炒派將籌錢放在「工作首位」，市民都明係咩事嘅！ 

https://bit.ly/2kgU8qg

https://www.speakout.hk/app