大多數時候，人有爭強好勝心，係好事，但大家又有冇見過賣國賣港都爭第一嘅人？講起上嚟，香港攬炒派政客嘅荒謬事情簡直無奇不有，賣國賣港「賣出國際」嘅香港眾志黃之鋒，同壹傳媒老闆黎智英之間，近排就似乎因為賣國、爭寵問題，搞到頗有「火藥味」。黃之鋒噚日喺自己facebook就po咗篇貼文，主旨意思就係批評《生果報》標題「作嘢」，搶咗佢「打國際線」嘅風頭。廣男想講，呢一老一少兩個賣國賊，有冇再肉酸啲啊！
「齊上齊落」 變成為錢反目？
根據黃之鋒嘅描述，件事簡單嚟講，就係個幾月前，黃之鋒接受生果報訪問邀請，諗住幫生果報谷下訂閱量都「無妨」，但唔知點解，「訪問期間講話外國國會幕僚有睇蘋果，同埋黎智英係國際唯一認識既民主派商人。結果個標題變成『黃之鋒打國際線靠《蘋果》』」。黃之鋒條氣梗係唔順啦，於是急急腳表態「黃之鋒打國際線梗係靠眾志、靠香港人」，仲好擔心「唔知有無黃絲叔叔姨姨見到…本來想課金支持眾志國際線，變左課金訂閱報紙」。
心水清嘅市民，係咪已經睇到問題所在？冇錯啦！講嚟講去，不外乎兩樣嘢，一係「風頭、功勞」，一係「金錢支持」，廣男就話，歸根究底咪又係「利益」兩個字！但問題嚟喇，唔係講好「齊上齊落」嘅咩？依家就為咗「邀功、爭寵」、「爭風呷醋」而失和？唔係講好要一齊「追尋崇高理想」嘅咩，依家就為咗金錢利益而反目？
利益面前 政客露出真面目
講真，呢兩位跟住落去又會係咩玩法？邊個爭得贏？廣男唔知；但賣國賣港都要爭「NO.1」，就點都稱得上係天下奇聞。不過從另一個角度睇，呢件事亦都俾大家睇清一樣嘢，就係有啲人賣國賣港、賣得更落力，的確係有利可圖嘅，既為地位、亦為資源，廣男甚至喺度諗，由佢哋嘅「主子」角度，會唔會「論功行賞」，有幾大「功勞」，就意味住可以得到幾多「資源支持」呢？嗱，呢樣嘢廣男就唔多估喇，不過廣大市民又真係要諗下，自己嘅家園、國家，就俾有啲人攞嚟圖自己利益，叫人情何以堪？！
講開又講，廣男發覺原來黃之鋒已經唔止一次「寸」《生果報》、黎智英，之前《生果報》喺頭版刊登全版「求救信」，呼籲市民一人一信要求特朗普「救香港」，當時黃之鋒就批黎智英「畫公仔畫出腸」、「骨痺同肉麻」…照咁嘅發展睇嚟，大家認為依家攬炒派之間，係咪似乎有一種要「攬住自己人死」嘅勢頭呢？如果問廣男，廣男會話，大家無謂咁操心，不如邊食花生邊睇戲喇！
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論