黃之鋒被告阻礙公職人員罪，保釋後話自己被打，仲畀人嘲諷同辱罵，如果佢真係畀人打，廣男當然反對；至於佢話畀人辱罵，廣男既第一反應係，乜黃同學都知嘲諷同辱罵人有問題既咩？
 
必須重申，在日常交流、辯論甚至爭執既過程，廣男都唔鼓勵人嘲諷甚或辱罵人；但一直以嚟，黃之鋒對待官員、非同路人同警察既態度大家都有眼見，既然嘲諷同辱罵都係不可為之，咁佢平時又咁仗氣凌人，其實有冇諗過畀佢嘲諷、辱罵既人既感受呢？
 
除咗態度，仲有一點黃同學都應該好好諗一諗，學民、學聯既同學早前落區宣揚雨傘運動，受到抨擊既程度猶如過街老鼠，歸根究底，就係市民唔支持佢哋，認為雨傘運動發展至此，都應該到此為止。再將行動拖落去，受害既唔止係市民大眾，對於要走從政路既黃之鋒，變到神憎鬼厭，對佢自己都唔好啦！
 
因為反國教，黃之鋒頭上面既光環係仍然閃亮既，但呢個光環令佢越抗爭、越「上頭」，一時叫人衝政總，一時叫人違法佔領，一時又帶頭違抗禁制令，越走越激烈，越激越過界。泛民中人開口埋口都叫人「勿忘初衷」，如果真係「不忘初衷」，咁說好的「愛與和平」又喺邊呢？
 
相信呢個周末喺旺角又會一場攻防戰，如果示威者係本著「和平、理性、非暴力」既理念做事，嘲諷、辱罵同衝擊都唔應該再存在。
 
原圖：bastillepost