攬炒派之所成日俾人叫佢哋做「盲反派」，其中一個主要原因就係佢哋不問因由，有理無理，但凡係政府嘅都反對咗先；最新嘅例子，就係教育局要為新入職教師同現職教師提供培訓，內容包括有「專業角色、價值觀及操守」以及「本地、國家及國際教育議題」等，教協例牌地「條件反射式」反對，仲話教育局咁做有「政治動機」，質疑教育局要「政治洗腦」。囍雨又係果個問題，教協作為教育界「龍頭」組織，唔係唔知依家教育界發生咩事呀？
教師仇警又違法 要教育局不作為？
其實要討論教育局提供培訓嘅做法前，囍雨請教協先回想下過去一年發生過咩事。黑暴運動肆虐香港，暴徒四處打砸搶燒，警察成為被抹黑、攻擊甚至襲擊嘅對象，作為教育界一分子，唔少老師不顧其專業操守，散播仇警甚至咀咒警察家人嘅冷血言論，呢啲問題，教育局係咪發完信警告就唔駛跟進先？
同樣嚴重嘅問題係，黑暴運動持續一年，就已經共有約80名教師因為參與「社會事件」被捕，今日先有教師襲警罪成，如果你問囍雨，囍雨就會認為歸根究柢，係有教師嘅思想、行為都出問題，部分原因可能係佢哋唔知道自己作為老師要有專業、道德操守，部分原因則可能係因為佢哋反中仇中，無接受適當嘅國家教育。
喺呢啲前提底下，先唔講教育局應該做啲乜，大家應該問教協喺呢啲問題上做過啲乜！教師散播仇警言論，佢哋包庇到底；有教師歪曲歷史，佢哋又搵藉口包庇；甚至有教師涉嫌違法，佢哋都無譴責過啲教師。事情嘅本質，就係教協自己不作為，反而去攻訐認真處理問題嘅教育局，教協嘅做法，會唔會太令人失望呢？
葉建源枉為教育界代表
本來為教師提供培訓，就唔係咩特別嘅事情，而黑暴運動肆虐香港咁耐，屢次出現「問題教師」，教育局提供培訓就變得更有必要。囍雨喺報道中睇到，立法會教育界議員葉建源話教育局非師資培訓機構，無資格主辦專業師資培訓課程，囍雨反而想講，葉建源喺過去一年不斷縱暴包庇暴徒，完全無一個教育工作者應有嘅道德同專業操守，講起無資格，係葉建源無資格做立法會教育界代表先真！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論