反修例運動經歷一年，有近9,000人被捕，當中四成都係學生，仲有唔少係中學生；對於被捕、被告，有人選擇面對審訊，亦有人選擇棄保潛逃、逃避罪責。最新消息，就係「香港獨立聯盟」陳家駒之前被控非法集結，據報佢已經潛逃咗去荷蘭，囍雨就喺度諗，佢係因為怕承擔非法集結罪而棄保潛逃，定係因為怕「港區國安法」立法，自己「大罪」將至？無論如何，犯法就係犯法，就算係政客，都一樣要負責！
寬鬆的保釋條件？
據報，喺陳家駒嘅保釋條件上，並沒有禁止陳家駒離港，所以陳家駒要潛逃，真係「話咁易」，囍雨質疑，一啲高危人士，例如一啲攬炒派、「港獨」派嘅頭面人物，其實只要佢哋「想走」，基本上多數會有外國勢力願意接收佢哋，法庭處理呢啲「高危政客」嘅保釋申請時，係咪應該「加辣」呢？否則，會唔會好容易出現今次情況，法庭准保釋，疑犯轉頭就「走佬」？
對於呢次陳家駒畏罪潛逃，囍雨喺度大膽估計，佢唔係因為非法集結罪而潛逃，而係因為「港區國安法」。好簡單，如果前者罪成，就算法官無輕判到，陳家駒可能最後連監都唔駛坐；但如果擺明搞「港獨」嘅陳家駒日後因為「港區國安法」被捕、被定罪，咁要坐監嘅話，入獄時間肯定係以年計算。所以，喺「權衡利害」之下，陳家駒可能知道自己「獨」罪難逃，就潛逃海外。
國安立法 「獨」罪難逃
其實喺黃家駒之前，已經有本土民主前線嘅黃台仰、李東昇同李倩怡因為參與旺角暴動被告而畏罪潛逃，如果你問囍雨，囍雨會認為，「港獨」派喺香港已經失去「戰鬥力」，日後「港區國安法」立法，再煽動「港獨」，更隨時要承擔罪責，大家睇下近期啲攬炒派議員全部「封口」，有啲人更「轉口風」圖洗底，就知道法例唔係「無牙老虎」，仲相信政客、以為可以煽動「港獨」，真係要先睇下啲政客點避點縮先。
日前有梁繼平，近日又有陳家駒，囍雨覺得，「港獨」派、本土派最不負責任嘅地方在於，搞完一次又一次大龍鳳，自己走去擁抱外國勢力，但就留低其他年輕人喺香港「送頭」承擔罪責。香港嘅年輕人仲要勇武抗爭？咁就要先有特犧牲嘅準備，但犧牲嘅同時，大家要知道有政客頭目正在外國「風流快活」囉！
圖片來源：文匯報
請Follow我們的YouTube頻道：
下載我們的手機應用程式，收看第一手精彩內容：
評論