無論「港區國安法」消息出台又好，美國因為警察暴力同種族歧視問題出現「美麗風景線」又好，呢排一直好低調、潛嗮水嘅立法會議員涂謹申，今日突然「浮出水面」，佢出嚟講啲咩？原來又離唔開「阿爺」出手立國安法同嚟緊立法會選舉。今日涂謹申喺一個電台節目直頭講到，中央推行「港區國安法」，係因為「估計9月立法會選舉結果，建制派未必佔大多數」云云，對於咁樣嘅因果關係，囍雨聽到「O」嗮嘴，唔該涂謹申先睇下舊年10月31號，中央四中全會究竟有咩宣佈先。
涂謹申的「想當然」邏輯
涂謹申嘅意思似乎係想講，中央睇到舊年建制派喺十一月區選失利，於是就有訂立「港區國安法」嘅諗法，但睇番條時間線，中央喺舊年10月尾四中全會上，已經講到明要下決心「建立健全特別行政區政府維護國家安全的法律制度和執行機制」，按照涂謹申嘅邏輯，即係中央「未卜先知」一個月後建制會係區議會選舉大敗？唔好玩啦！
其實大家可以換個角度諗下，如果中央出手真係諗住為建制「助攻」，又點會揀依家呢個時間嚟搞立法？再諗深一層，依家嘅事態係咪正正反映咗，其實中央決定立法，選舉因素根本就唔喺考慮之列。囍雨想講，好心涂謹申以至啲攬炒派政客，唔好成日為咗抽政治水、搞選舉工程，就預先set一個自己「想當然」嘅結論，然後又左堆右砌啲似是而非、實則經唔起推敲嘅嘢去合理化自己嘅憑空想象喇！
攬炒派太不了解國情
囍雨聽政壇高人講，其實由涂謹申嘅「認知」可以睇到一個現象，就係呢班攬炒派太唔了解國情，佢哋對中央、國家嘅種種批評，只係基於自己對腳企喺香港，但其實根本唔明白成個中央政制體系、國家機器係點運作。大家要明白一點，如果一項提議，可以擺上去年十月底四中全會嘅議程，基本上早在會期半年前甚至更早、未有黑暴之前，就已經開始醞釀；四中全會宣佈之後，再到今年五月底全國兩會作出《決定》，中間又係大半年，所以大家要睇到，其實由醞釀到研究、再到決定，甚至到之後推出正式法律文件，係一個經過長時間觀察、調硏、籌備嘅過程，唔係好似有啲政客想象，中央今日見到有黑暴有「港獨」，明天就拎條國安法出嚟。你估私人公司咩！
當然，涂謹申以至攬炒派依家講嚟講去，乜都可以扯到去選舉，其實大家心知肚明，佢哋就係為咗政治利益自己「飯碗」，要搞販賣恐懼果套，但問題係，香港作為國家一部分，有冇責任維護國家安全先？嗱，涂謹申自己都係法律界出身，但似乎一直都迴避咗一個問題，點解香港回歸23年，都做唔到「23條」立法呢？
當年有無人搞「港獨」、黑暴？
囍雨聽涂謹申今朝喺電台節目，仲批評當年有份處理23條立法嘅葉劉淑儀「變咗」，一時又批評依家嘅律政司司長鄭若驊「乜都不排除」…囍雨又想講句，正常守法嘅市民，唔搞「港獨」唔搞分裂國家，唔搞恐怖活動，使乜驚一條國安法呢？依家究竟邊個嚇緊市民呢？
囍雨聽高人講，其實當年從董建華之後，一路都有人話要搞23條立法，但結果屆屆都因為「諸多考慮、有所顧忌」，到今時今日已經唔係第一次拖延，而係一拖再拖。但大家睇番轉頭，23年前回歸，乃至2003年推23條，當時嘅社會、政治環境，好多嘢同依家都已經好大唔同；的確，當年立法嘅即時性未必有依家咁強，點解？大家又不如諗下，當年有冇人揸「港獨」旗要「光復香港」？有冇人上街遊行舉晒大批英美國旗、搞到好似美國國慶巡遊咁款？又有冇人用依家黑暴咁兇狠嘅手段，搞所謂「抗爭」，到處殺人放火、襲警、私了、破壞、恐襲？「阿爺」忍完又忍，忍到今日迫不得已要堵塞呢個國安漏洞，又有咩唔啱先？！
其實，涂謹申依家出嚟講咁多嘢，咪又係為咗選舉利益，但又有幾多係信得過嘅呢？所以話，有時政客嘅嘢，你信佢一成都「雙目失明」！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論