中央決定就「港區國安法」立法，令一眾攬炒派政客即時「無所適從」，有政客話自己「會收聲唔再講踩界嘢」，亦有政客話「寧願要23條立法」；囍雨今日睇新聞，見到攬炒派元老李柱銘稱23條立法責任喺政府同建制派身上，因為建制派一直喺議會佔大多數，又指「港獨口號、舉港獨標語應否入罪」，關乎係咪屬於言論自由云云。囍雨想問一句，如果講「港獨」、舉「港獨」標語關乎言論自由，咁言論自由究竟有無底線？
很多罪行也是因言入罪
根據李柱銘嘅邏輯，一個人叫下「港獨」口號、舉下「港獨」標語，係關乎言論自由，而言論自由嘅意思，「就係幾唔鍾意聽，你都要畀人講」，咁囍雨又想同李柱銘商榷下，如果有人喺飛機上舉牌話「我要劫機」，或者「我身上有炸彈」，呢個又係唔係言論自由嘅保障範圍之內？又或者，誹謗、不實地指控他人，又屬唔屬於言論自由？
其實，有唔少罪行都係因為言論而入罪，例如誹謗、刑事恐嚇等等，都係關乎言論，李柱銘呢種「言論自由大晒」嘅論調，好容易誤導他人以為因為「言論自由」，就「講乜都得」；其實有一個好簡單嘅實驗，就係如果講某啲嘢無事，相信好多政客都會講，但以李柱銘本人為例，佢同佢班黨友可以話係無一個講「港獨」，點解嘅？係怕參選時俾人DQ，定係怕自己墮入「法網」，真係值得大家好好思考。
23條立法 責任不在攬炒派？
至於李柱銘講到2003年香港唔能夠為《基本法》23條立法責任在政府、建制，囍雨直頭覺得係一個笑話。當年政府要為23條立法，攬炒派可以話係「咩招」都出盡，遊行、「拉布」、動議擱置、到美國唱衰法例、七一遊行等等，最終政府讓步撤回立法，囍雨橫睇掂睇，攬炒派都係最大嘅「兇手」，依家李柱銘講呢番話，完全顛倒是非，極為賴皮，囍雨想問一句，將來23條做本地立法果時，李柱銘以至民主黨又係咪會支持先？
其實中央就「港區國安法」立法，特區政府日後仍然需要為23條做本地立法，如果李柱銘等政客嘅「寧要23條」諗法係真啲，簡簡單單，第時本地立法，又或者喺未來一段日子裡，民主黨敢唔敢講支持23條立法？如果唔敢，相信所謂「寧要本地立法」，只係狡辯同政治口號嚟啫，李柱銘講嘅嘢，大家真係唔好「信」！
請Follow我們的YouTube頻道：
下載我們的手機應用程式，收看第一手精彩內容：
評論