全國政協副主席梁振英噚日同一班KOL做直播節目，囍雨好奇上網聽下佢哋講乜，唔聽由自可，一聽即刻成個人醒晒，依家坊間對於「港區國安法」係咪有追溯期、係咪由國安法庭負責相關案件都非常關心，而梁振英就指出咗重要兩點，第一就係有冇追溯期，要睇下有冇人利用呢段時間「鬥快」、「你立法，我就做法例禁止嘅四項行為」，即係有冇人借空窗期搞事；至於有冇國安法庭、執行問題，梁振英亦點出，喺外國但凡關於國家安全，都一定唔係地方政府負責，否則地方如果搞獨立，地方政府點做？囍雨就覺得，綜觀梁振英一番話，佢分析嘅重點其實好簡單，就係如果有人諗住借呢段時間搞事？唔駛旨意！
針對少數人 刑罰不會輕
囍雨聽完梁振英同一班KOL嘅對話，有一個好強烈嘅感覺，就係「港區國安法」，不論係分裂國家、顛覆國家、勾結外國勢力抑或組織恐怖活動，所針對嘅都只係極少數人，例如搞「港獨」、支持「台獨」，又或者係組織極端暴力嘅不法分子，社會絕大部分人，唔駛怕，因為法例所針對嘅人，係破壞緊特區、「一國兩制」嘅人；更重要嘅一點係，依家仲有政客試圖勾結外國勢力，叫外國勢力針對、制裁中央同香港，囍雨要話俾呢啲人知，依家「港區國安法」內容都未定，政客仲喺度搞事，如果有一日要承擔罪責，都係政客們咎由自取，而且講到明呢類罪行唔會輕判！
攬炒派「鍊爆」 磋跎香港歲月
至於有市民對「港區國安法」有所憂慮，梁振英亦講出一個故事，當年23條要立法，竟然有人話如果23條通過嘅話，屋企有本聖經都犯法，但又有人信；囍雨依家睇返轉頭，香港人其實俾攬炒派政客或媒體「靠嚇」咗咁多年，但香港有冇出過咩事呢？當年香港回歸祖國，啲人話「香港已死」；到2003年，攬炒派妖魔化23條；2017年，有攬炒派為反高鐵「一地兩檢」聲稱行近西九高鐵站會俾內地人員捉走。攬炒派「靠嚇」嘅手段，大家聽得多，但囍雨要問一句，香港有冇發生過啲咩事？就係因為一個「嚇」字，香港當年無就23條立法，最終造成今日嘅亂局。
依家唔少攬炒派政客反口，稱「寧願香港自己就23條立法」，囍雨真心覺得可笑，當年香港有機會就23條立法，攬炒派政客空群而出反對，亂局發展到近年，「港獨」、「五獨」合流、暴徒打砸搶燒，甚至連槍械炸藥都玩，成個局比攬炒派、黑暴分子「鍊爆」咗，依家先話想要返23條立法？唔好玩「語言偽術」啦，就算依家開始23條立法，你哋咪一樣反對，一樣拉布！
罪魁禍首 還是政客
其實，當年中央之所以俾香港自行就23條立法，係因為知道港人對「國安法」有疑慮，
擔心刑罰太重，所以俾香港按自己情況自行立法；但香港回歸近23年，到今日都依然未為23條立法，政客搞局，越玩越串，越玩越過火，仲公然揸「港獨」旗、美國旗同英國旗，呢個結果，根本就係攬炒派造成。攬炒派嘅「靠嚇」伎倆，嚇足香港人23年，喺香港搞事搞足23年，依家中央要就「港區國安法」立法先識嚟驚？抱歉，驚嘅只係你哋，唔關奉公守法、想保護「一國兩制」嘅香港人事。
圖片來源：中通社
請Follow我們的YouTube頻道：
下載我們的手機應用程式，收看第一手精彩內容：
評論