每年到呢個時候，支聯會都會喺維園搞燭光晚會，過去30年都可以話冇受過干預、影響。不過今年因為疫情關係，警方噚日發出咗反對通知書，即係話，如果有人仲要「堅持入維園」，隨時可能觸犯「限聚令」。但明目張膽反中亂港嘅《壹傳媒》老闆黎智英，偏偏繼續「對著幹」，廣男睇今日《生果報》有篇黎智英專訪，直頭講到如果「反感國安法，要抗爭，六四係一個表達方式」。廣男想講，黎智英明知集會不獲批，都仲想推人去犯法？！依家叫人「抗爭」，係咪「吹雞」叫黑暴分子「做嘢」？！
搞集會的弦外之音
一直以嚟，黎智英煽動暴力「抗爭」，廣男認為離唔開兩個「定式」，一係扮被打壓、一係堆砌歪理。今日呢篇專訪，又係呢套。簡單而言，黎智英係想話俾人聽，如果中央訂立「港區國安法」（甚至如果有追溯效力嘅話），大家就「只能做自己覺得應該做嘅嘢」，呢個時候大家「有責任企起身，保護香港人嘅自由法治」；而搞集會就係一個方式，即係面對「政府打壓」，大家都可以「用自己嘅方式去克服困難」……，睇到呢度，廣男請問大家，黎智英係講緊搞燭光集會？定係講緊叫人對抗中央、反對訂立「港區國安法」？
廣男就不妨講得直接啲，黎智英講咁多嘢，所謂搞集會只係表面功夫，弦外之音係煽動緊上街「搞事」。但首先一個最直接嘅問題，依家疫情未過係事實，又有本地群組感染係事實，呢個時候，任何形式嘅聚眾活動，本身就有好大病毒傳播嘅風險，甚至可能違反限聚法例；再進一步，如果到時真係又有黑暴聽黎智英「隻笛」出嚟藉機搞事，仲隨時危及市民人身安全。廣男真係要講句，黎智英你自己想搞政治係一回事，要「上街」大可自己去，唔好攞市民健康同安全嚟「較飛」！
保自由護法治 要靠「港區國安法」！
仲有，當黎智英講到反抗立法、「『我哋』只能做自己覺得應該做嘅嘢」之時，大家又應該同講黎智英講番句，唔該你先搞清楚，「港區國安法」對正常市民完全冇影響，之不過你黎智英本人就的確好難講，但呢啲係你「自己嘅事」，所以唔好諗住依家又拖埋其他人落水，更加唔好再推啲年輕人出嚟去幫你「抗爭」！
不過黎智英今次有句話，廣男覺得佢講得啱，就係「呢個時候要企起身，保護香港人嘅自由法治」，但唔係用黎智英所講嘅「抗爭」，更加唔係聽佢煽惑去上街「送頭」，而係大家要發聲反黑暴、支持中央訂立「港區國安法」，香港先至真係有前途！諗番轉頭，廣男想講，香港的確亂夠了，被黎智英呢啲人害夠了，香港人亦都受夠了，大家係時候做番啲正確嘅事，令香港盡快回復正軌。
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論