喺太平洋嘅另一邊，有一班人為咗反對種族歧視、反對警暴，正喺度同邪惡嘅美國總統特朗普政府「作戰」，正當大家以為香港嘅「正義」攬炒派會為美國「手足」發聲？錯喇，佢哋竟然完全無聲援美國「手足」、對抗特朗普！有傳媒為咗呢件事去問攬炒派嘅回應，竟然大部分攬炒派議員都無回應，或者就算有回應，都完全唔譴責特朗普同美國警察；正義？自由？公平？對於攬炒派嚟講，只係政治口號，no more！
攬炒派醜態百出
有傳媒就美國騷亂、示威者武力等問題追問攬炒派回應，結果民主黨絕大多數議員無回覆，公民黨立法會議員楊岳橋就叫記者問外交部發言人，本土派立法會議員朱凱廸就質疑記者「以為執到寶」。有網民就串呢班攬炒派，「美國警察咁暴力，反對派是否要譴責呢？但係特朗普又話要出軍隊鎮壓暴徒喎！到底支持美『手足』定係特朗普呢？」
其實，選擇支持美國嘅示威者，係一句說話；選擇支持特朗普呢，亦只係一句說話。攬炒派政客左閃右避，連表態都唔敢？算咩從政者呢？囍雨就認為，如果單純講件事，以攬炒派嘅政治立場，應該會企喺示威者或者暴徒一邊，因為警察涉嫌殺人係事實，美國嘅警暴、歧視同不平等問題亦係事實，理論上攬炒派「無理由」唔支持佢哋；佢哋之所以唔出聲，係因為佢哋依家乞求緊美國干預中國、香港事務，想人哋嘅總統出頭「幫佢哋」！
仁義道德 只是口號
所以呢，仁義道德好，民主自由好，對攬炒派而言，根本只係口號，對住香港政府，佢哋就「係威係勢」，對住美國政府，就剩係識得搖尾乞憐同唯命是從。講到底，佢哋為嘅亦唔係咩普世價值，而係政治利益。觀乎《生果報》老闆黎智英以至攬炒派嘅態度，佢哋想特朗普出手制裁中國、香港，從而令中央唔再推出「港區國安法」，但佢哋嘅想法有兩大謬誤，第一係中央推行「港區國安法」嘅決心，大得無容置疑；第二就係，攬炒派仲會覺得特朗普有心情去幫香港嘅攬炒派？聽講有段時間特朗普自己都匿咗喺白宮嘅地堡喎！簡簡單單，如果攬炒派仲有啲立場同原則嘅，唔該，行出嚟評價下自己「主子」，或者講清楚自己立場，唔好喺度扮正義，但對住某啲事件又「扮睇唔到」！
請Follow我們的YouTube頻道：
下載我們的手機應用程式，收看第一手精彩內容：
評論