中央決定訂立「港區國安法」之後，囍雨聽聞唔少支持立法嘅市民呢排都好關心兩個問題，一個係邊啲人會「受影響」，另一個就係「會唔會有追溯期」。喺呢一刻，囍雨對於上述問題梗係唔知答案啦，不過之所以提起呢個話題，係因為見到撕破面皮通蕃賣國嘅壹傳媒老闆黎智英，近日仲「好積極」咁對住外國媒體發聲，一時呼籲美國「必須起帶頭作用…讓北京承擔制裁」，一時又投書美國媒體，攻訐「港區國安法」以至中央，總括嚟講，目的只有一個，就係想美國出手繼續賣國賣港。所以囍雨喺度諗，如果第時真係有追溯期，黎智英呢啲言行，係咪應該可以成為證據呢？
教美國如何制裁中國
中央層面立法，講到明要針對分裂國家、勾結外力等四類行為同活動；黎智英睇嚟唔單止不知收斂，反而繼續對抗。就好似日前投書美國媒體篇文章咁，囍雨睇佢想表達幾樣嘢，一係妖魔化「港區國安法」，講到好似係侵蝕港人各種自由嘅洪水猛獸，話香港將從「法治社會」變成「被國安法統治」；一係「教路」美國如何「反制北京」，例如取消官員子女嘅學生簽證、鼓勵港人移民等等；仲有一點值得大家留意，就係黎智英似乎仲要繼續煽動「抗爭」，講什麼「港人抗爭進入新階段」云云，囍雨睇完全篇有一個感覺，就係中央立法所訂立嘅四條「紅線」，黎智英係咪條條都踩中嗮呢！
當黎智英講到因為有「港區國安法」之後，港人就會冇嗮各種合法自由時，囍雨其實好想反駁一句，今時今日，港人除咗冇「免於黑暴恐懼的自由」之外，仲有咩自由係受到損害嘅呢？新聞？言論？定係合法嘅遊行集會？如果按照黎智英嘅邏輯，中央立法禁止分裂國家、顛覆政權嘅言行，都叫「打壓自由、以言入罪」，囍雨想講，第一，所有真心愛護香港嘅市民唔需要呢種「自由」；第二，任何國家都唔會有賣國嘅自由；第三，黎智英講呢啲「自由」，似乎正正玷污咗人類追求自由嘅真正意義同價值！
「抗爭」進入新階段？
依家黎智英為咗「call外援」反立法，甚至極盡肉麻地形容「外國影響力絕對是我們唯一的救贖」，一邊叫美國「帶頭制裁」、一邊「教」美國如何制裁，囍雨真係唔怕難聽講句，黎智英基本上同打開自己屋企叫賊人入嚟偷嘢搶嘢、同以前漢奸幫侵華日軍帶路入村「搶、燒、殺」冇乜分別，呢種行為，兩個字可以講嗮：賣國！不過話時話,美國依家都咁多地方發生騷亂，自己都未顧得掂，仲有幾多精力理會香港？黎智英不如先譴責下美國警察過分使用暴力先喇！
當然，大家都要唔可以唔警惕，黎智英今次所謂「港人的抗爭進入新階段」究竟咩意思？大家都見到，喺黎智英等人煽動下嘅所謂抗爭，足足喺香港打砸搶燒咗成年，依家仲要進入「新階段」？黎智英喺度明示或暗示緊啲乜呢？講真，越睇得多黎智英嘅所作所為，囍雨就越認同身邊還多人都有嘅一種觀點，就係「港區國安法」日後實施，黎智英呢啲人一日唔可以繩之以法，香港就一日不得安寧！
請Follow我們的YouTube頻道：
下載我們的手機應用程式，收看第一手精彩內容：
評論