全國人大代表通過投票決定制定「港區國安法」，向來支持香港攬炒派嘅外國勢力或者台灣勢力，紛紛「衝出嚟」話要「支援」港人；其中有報道指英國外相藍韜文聲稱會俾BNO護照持有人由「目前只可以逗留喺英國六個月嘅限制」，放寬到可以去英國申請工作同讀書12個月後續期。咁講法，係咪即係「收留」香港嘅BNO持有人？咁著數？大家要先睇清楚，唔好表錯情！
儲定錢過去送俾英國？
有持有BNO護照嘅朋友話俾囍雨知，喺英國工作簽證申請人如喺當地生活同工作五年，理論上可申請永久居留，如果係從事英國短缺嘅職業，仲較易獲批工作簽證；但問題嚟喇，依家英國過200萬人失業，有分析預計失業率可能會升到近10%，香港人就算攞住BNO，可以去英國居留一年，係咪咁易搵到工呢？
喺網上面，有一段評論事件嘅留言，囍雨覺得形容得相當貼切，留言嘅大抵意思係話英國俾一年時間香港去「用晒啲錢」，一年之後，有錢嘅就可以繼續留低；無錢嘅呢？當然係要執包袱走啦，分分鐘仲會俾人當係非法居留。要搵定錢過去英國「等運到」，或者搵定工先過去，有啲香港嘅BNO持有人以為有著數，事實並唔係咁囉！
中學生、大學生都無分
仲有一個問題，就係持有得BNO嘅人，最起碼都係1997年或之前申請，現時唔接受新申請，所以依家喺街頭嘅大學生、中學生，理論上都唔會有幾多個有BNO護照；即係話，就算真係有人攞埋錢去英國生活，搏做幾年嘢攞到英國居留權，都應該無啲大學生、中學生份，咁如果有啲未夠秤、根本無BNO嘅人諗住有機會去英國，係咪又表錯情呢？
囍雨要講句，英國打「開口牌」所講嘅支援措施，簡單啲講，只係「延長一下簽證期」，同本身有冇好大分別？囍雨唔覺，但唔少香港人就以為英國「好幫手」。其實，英國人最擅長就要玩政治，知道點都要為香港班攬炒派「出下聲」、但又唔可以實際幫好多，所以就諗到「延長BNO簽證逗留期」呢個做法，表面上話幫你，實際上？自己諗下啦！
原圖：新華社
請Follow我們的YouTube頻道：
下載我們的手機應用程式，收看第一手精彩內容：
評論