呢幾日同朋友講起「港區國安法」，大家都笑住喺度討論，究竟咩人會「受影響」呢？執筆之時，咁啱全國人大會議高票通過有關立法嘅《決定》草案，即係話，下一步就係制定法律，然後喺香港實施。「港區國安法」講到明要懲治四類行為及活動（此不再詳述），廣男就喺度諗，如果用呢四個準則去衡量，大家自己心目中可能都會有一個「懲治名單」，好坦白講，喺廣男諗到嘅名單入面，一定包括香港眾志嘅黃之鋒！
周圍唱衰香港叫「交流」？
身有屎嘅人，自己一定知。廣男今朝聽電台，當黃之鋒被主持人問到日後「港區國安法」會有咩影響時，又開始帶大家「遊花園」，一時話「以言入罪」，一時又話自己周圍「遊說」，只係言論上嘅「主張、交流」，唔涉及任何實質行為；最可笑嘅，係黃之鋒攞自己周圍唱衰香港、請求「制裁」，同特區官員出訪作類比，大概意思係話香港政府嘅特首、官員都有去美國交流啦！唔通咁又叫「外國勢力干預香港」？！
廣男想講，呢種問題，真係只有厚顏如黃之鋒先講得出口。特首、官員出訪，係官式訪問，係為香港爭取利益；黃之鋒之流，係周圍叫人「制裁香港」，根本兩個截然不同嘅概念！更何況，黃之鋒又唔講下，自己周圍遊說「國際戰線」，係講啲乜？廣男唔係話，對住外國人就唔可以批評香港，但當黃之鋒不斷「呼籲」外國搞香港、搞中國時，佢有冇講黑暴點樣實施恐襲、私了市民、殺人放火？又有冇話俾外國人知，香港有班攬炒派政客要癱瘓議會、癱瘓政府、攬炒香港？答案係一句都冇。好心黃之鋒唔好講完啲以偏概全嘅歪理之後，仲喺度扮正義扮為香港好啦！
做過什麼 自己心知肚明
依家「港區國安法」可以話係如劍高懸，黃之鋒內心驚唔驚？廣男唔知，亦都懶得估，不過黃之鋒呢幾年如何賣國賣港、做過啲乜，自己心知肚明，例如去美國國會聽證會呼籲通過用嚟「制裁香港」嘅《香港人權及民主法案》；又例如公開要求美國將「制裁」加辣…等等，黃之鋒千祈唔好以為港人唔記得，更加唔好以為中央會不聞不問，日後「港區國安法」實施，黃之鋒如果仲要繼續做呢啲嘢，廣男認為，結果其實只會得一個。今天黃之鋒仲對住新聞鏡頭，好囂張咁叫「北京懸崖勒馬」，廣男就話，呢句話請黃之鋒留番自己受用吧！
請Follow我們的YouTube頻道：
下載我們的手機應用程式，收看第一手精彩內容：
評論