廣男同朋友傾計，成日講呢個世界總係有啲人「政治慾望」不斷，就算不在其位，甚至已經離開咗曾經生活嘅地方，都會想盡辦法「干預」、借機「露面」。廣男講緊邊個，咪就係香港「末代港督」彭定康囉！廣男今日睇新聞，見到彭定康聯同約二百位政壇人物聯署，「譴責北京單方面在港引入有關法例，並呼籲多國政府聯合反對這種公然違反《中英聯合聲明》的行為」。廣男想問下，依家到底係中央違反《聯合聲明》，定係彭定康等人干預中國內政先？
中央違反《聯合聲明》？
驟眼睇中央有意制定「港區國安法」，聽埋攬炒派政客嘅「論調」，真係有啲人會以為中央破壞「一國兩制」、《基本法》以至《中英聯合聲明》，但咪住先，中央係咪無權為港立法呢？答案梗係唔係啦！根據《基本法》第18條，人大常委會有權就列喺附件三嘅全國性法律作出增減，並喺危及國家安全嘅情況下，將全國性法律宣布在港實施。即係話，人大常委會有權將全國性法律納入《基本法》附件三並在港實施，呢樣嘢係《基本法》一部分，點會破壞《基本法》或《聯合聲明》呢？再者，今次立法關係到國家安全、穩定，英國都有類似法律喎！
彭定康借機攻訐中央，預咗，但廣男非常好奇一件事，當彭定康以至其他「政壇人物」聯署諉過於中央政府時，點解彭定康唔諗下或者正視下香港喺過去一年發生過咩事呢？咩人搞暴動，到處打砸搶燒，甚至殺人放火？咩人不斷話要爭取「港獨」？咩人乞求外國「制裁」香港，擺明勾結外部勢力？廣男想問下，以上行為，係咪可以喺英國「合法進行」嘅呢？英國作為法治社會、民主國家，會容許人殺人放火、危害國家安全？
英國接受港難民？請快點！
睇返新聞報道，彭定康曾經講過叫英國政府要「收留」持有BNO嘅香港人，而英國首相約翰遜日前又稱如果「中國繼續向香港施壓，英國將可能向數以萬計港人提供庇護或難民身份」，言下之意，英國係咪打算接收香港嘅暴徒呢？如果係真嘅，講咗要算數呀，不過，唔知約翰遜做唔做到呢？依家嘅英國，疫情未搞掂，脫歐又未搞掂，約翰遜如果真係有呢個決定，搞唔搞得掂自己班支持者都係一個問題，廣男實在想像唔到，如果英國接受持有BNO港人或者以萬計嘅暴徒，英國到底會變成點？
同樣係前港督，衛奕信就曾表明暴力示威令人非常痛心，亦唔應該得到容忍， 而且面對咁嚴重嘅暴力事件，香港警察執法極為艱難，唔單止警員持續承受重壓，就連佢哋家人同子女都遭到威脅，處境極其艱難；就算大家都想解決事件，但係英國都唔能夠同特區政府講應該要點。但彭定康呢？不斷替暴徒、政棍「開脫」，邊個為香港好？唔駛廣男講啦！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論