今年全國兩會最重磅嘅消息，就係將「港區國安法」納入人大會議議程，並將於下星期四表決通過。消息一出，攬炒派即刻「坐唔住」，噚晚已經漏夜集體出嚟開記招，一時話「一國一制喺香港正式落實」、「一國兩制已死」，一時話係「以言入罪嘅萬能Key」，甚至講到「中央攬炒香港」…總之極盡能事挑撥港人恐懼。但囍雨要指出一點，呢啲將「港區國安法」無限妖魔化嘅講法，統統都唔係事實；制定實施呢條法律，正正係要為咗維護、完善「一國兩制」。
囍雨認為大家至少可以從兩個角度嚟睇呢個問題。雖然依家未有「港區國安法」嘅具體條文，不過即將提交全國人大表決嘅《決議》（草案），開宗明義就講到，「港區國安法」係根據中國《憲法》同《基本法》嚟制定、實施；今朝全國人大常委會副委員長王晨解釋立法，亦都清楚表明，立法基本原則之一，就係為咗「堅持同完善『一國兩制』」。即係話，《基本法》、「一國兩制」之下，港人所享有嘅各種權利保障，從來冇受過任何影響。
港獨黑暴不除 香港永無寧日
如果大家對呢種「官式表達」難以理解，咁又不如睇下，呢條法律係要用嚟對付咩人。簡單而言，係要打擊顛覆國家政權、分裂國家、外部勢力干預、同埋恐怖主義。所以總括嚟講，訂立港區國安法，既係為咗保障港人所享有嘅一切合法權益，同時要防範、打擊破壞香港、顛覆國家嘅分裂行為。囍雨想講，呢啲正正就係港人利益、福祉之所繫。
其實過去將近一年，大家都親眼睇到黑暴攬炒究竟做咗啲乜、點樣一步一步將香港推向危險之境。大家不妨諗下，當有人不斷喺街頭打砸搶燒、破壞銀行商舖，不斷襲警、殺人放火，甚至出動炸彈、汽油彈恐襲公路鐵路，然後通過破壞想達至「光復香港、香港獨立」…呢啲已經唔係講緊一般嘅政治問題，而係全方位破壞緊民生、經濟、法治；宏觀啲睇，係連國家主權、安全都受到衝擊！喺咁嘅情形之下，香港社會又點可能有正常嘅發展環境？當「一國」都被衝擊時，又點樣保障「兩制」？
由頭到尾都是攬炒派在破壞
依家中央主動出手訂立法律，打擊、懲治「港獨」、「黑暴」、「攬炒」，維護國家安全嘅根本目的，其實都係為咗保護大家原本應該享有嘅正常生活，令香港恢復秩序、法治同發展正軌，回復佢原本應該有嘅樣貌！但依家攬炒派仲話要「反抗」，有啲人講下講下，又扯落去叫人九月立法會選舉要投票，囍雨實在要講，其實呢啲印證咗一樣嘢，就係根本由頭到尾，想破壞「一國兩制」、攬炒香港嘅，就係呢班攬炒派政客，攬炒完之後仲要坐收漁利嘅，都係呢班人！
原圖：新華社
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論