全國人大代表將會審議「港區國安法」，攬炒派政客以至媒體，當然即刻擺出一副「全面打壓」嘅姿態，甚至稱香港將變成「一國一制」。老實講，「港區國安法」對於一般市民遊行、表達意見，係唔會有影響。咁係咪「港區國安法」無阻嚇力呢？咁當然亦唔係，好簡單，如果有政客不斷要求外國勢力干預香港，甚至話自己「為外國而戰」、「日日做漢奸」，將賣國付諸行動，咁廣男會認為，呢啲政客不論「老中青」也好，都可能會觸犯「港區國安法」。
不容分裂國家、勾結外力
根據已公開資料，「港區國安法」主要針對四大罪狀，禁止分裂國家、顛覆中央人民政府、外國干預及恐怖主義行為，簡單而言，如果有人喺香港搞「港獨」、意欲顛覆中央政府、「邀請」外國干預香港或者作出儼如恐佈活動嘅極端暴力行為，都會喺今次「港區國安法」所針對嘅罪行之內。如果一般人無進行以上活動，的確係唔駛驚。
咁問題嚟喇，咁咩人要驚「港區國安法」？當然係想搞「港獨」，甚至係咁叫外國勢力干預香港嘅政客或者黑暴分子啦！廣男就喺度諗，以「香港眾志」黃之鋒為例，佢一直積極要求美國「制裁」香港，建議美國「制裁」名單要包括警員、選舉主任或官員，甚至連官員家人都要「制裁」，如果「港區國安法」立法，而黃之鋒繼續要求美國干預香港，係咪涉嫌犯罪呢？
黃之鋒、黎智英「難逃罪責」？
比起黃之鋒，《生果報》老闆黎智英可能更加露骨，例如佢接受外媒訪問時，曾明言「美國正與中國展開的冷戰，是場道德權威的對抗，我們現在的遊行抗議可以說，是在你對手的陣營內，打着你們的戰事」，即係講到明自己「為美國而戰」；早前黎智英喺台灣節目發表政見，甚至表明心跡，話「我們很想CIA、我很想美國影響我們、我很想英國影響我們、我很想外國影響我們」，如果「港區國安法」真係立法，而黎智英又不斷邀請外國干預香港，咁又點計呢？
對於「港區國安法」，唔同人可以有唔同反應，對於廣男呢啲無意搞「港獨」、勾結外國勢力嘅平民而言，「港區國安法」對我哋嚟講無乜影響；但一啲有心分裂國家、顛覆國家嘅政客或者黑暴分子呢？「港區國安法」可能就好似一個「緊箍咒」咁，約束到佢哋嘅過界行為。如果「港區國安法」可以阻嚇到亂港分子，令香港回復平靜，對國家、對香港以至對市民而言，都係好事。
圖片來源：
請Follow我們的YouTube頻道：
下載我們的手機應用程式，收看第一手精彩內容：
評論