教協縱暴、煽暴，令到好多本身支持教協嘅教育界人士以至其他社會人士，都開始鄙視教協；最新例子，當然係眼見考評局喺DSE歷史考卷問考生係咪同意侵華嘅日本為中國帶來「利多於弊」，都依然盲撐考評局同出題嘅人士啦。廣男今日睇新聞，見到教協副會長、立法會教育界議員葉建源喺《生果報》撰文，繼續為考評局「抗辯」，廣男睇完篇文，只有一個想法，如果日本侵略嘅行為喪盡天良，根本唔需要討論，咁考評局仲要問考生呢個問題，為咩呢？葉建源講出題方式、評核功能，偏偏就無講到一個重要問題，就係題目涉及嘅道德、良知問題。
出題方式OK 乜都得？
其實，葉建源呢篇文講嘅，同佢或者教協之前講嘅，基本上都係「一脈相承」，廣男理解其大抵意思都係題目「驟眼睇有問題」，但其實如果「熟悉」考核模式、出題方式等等，會發現「儘管有些字眼或許讓人在觀感上不舒服，但題目的評核功能並無不妥」，所以佢絕對唔同意取消題目云云。
當葉建源講「咁多嘢」嘅時候，廣男首先要問葉建源一個問題，教育，既涉及知識，亦涉及品格、道德以至人性。呢條問題嘅根本，在於日本侵華、殺人姦淫，點解仲要問考生係咪「利多於弊」呢？廣男換個方式，例如「A君殺了B君多名家人，你同意A君為B君帶來利多於弊嗎？」講真，有冇人會咁問，殺人、姦淫唔係普世都會反對、譴責嘅咩？點解仲要問？
說到底 就是包庇！
講到底，葉建源以至教協，就係政治立場先行，要包庇所謂嘅「同路人」，老實講，教協已經淪為百分百嘅政治團體，無專業可言，甚至連基本嘅道德都欠缺；自去年黑暴運動至今，教協一直包庇黑暴、攻訐政府，依家由幼稚園、小學、中學、大學甚至考評局都出問題，教協依然要包庇，廣男想問，香港教育，係咪就係要教出一個又一個「衝衝子」？
講開又講，教協被傳媒踢爆有三個辦事處或者服務中心涉嫌有違章建築，葉建源作為副會長，竟然講到「唔關佢事」咁，有呢啲咁唔負責任嘅教育界代表，香港教育真係難見曙光。
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論