有時候同人較勁，一定係「你來我往」，你發現到對方有錯，對方又會聲稱「你都有錯」，不過要明辨是非，都係要睇下雙方講嘅嘢，邊個先至係有道理！好似考評局咁，明明出咗一條有引導成分、或會令人誤會日本侵華對中國「利多於弊」嘅考題，但攬炒派政客以至教協，竟然因為政治立場而全部企喺考評局一邊；作為攬炒派「最大平台」嘅《生果報》，近日仲出咗一篇報道，稱「初中生須學『港自古是華領土』、新版中史書滲政治任務，廣男實在充滿「黑人問號」，叫學生佐證香港自古係中國領土，都係政治任務？《生果報》為咗幫考評局、教協等轉移視線，真係乜都可以攻訐一番喎！
香港自古「不是」華領土嗎？
對於《生果報》呢篇報道，廣男唔喺度重複太多佢嘅內容喇，簡單嚟講就係有教科書有相關問題，然後又有教協人士質疑相關內容以至《基本法》教育等唔係歷史教育，而係為咗滿足政府嘅「政治要求」。廣男首先想問下，如果咁樣係出於政治，咁考評局問考生日本喺1900-45年間係咪為中國帶來「利多於弊」，呢啲又係咩要求？淡化日本侵華、反中央嘅政治要求？
廣男睇資料，早於公元前嘅214年，秦朝嘅南海郡，已經將香港納入管轄範圍，直至鴉片戰爭前，中國歷朝嘅2,000多年內，一直對香港實施有效管轄，如果有中史書以不同資料叫學生印證有關史實都有問題，廣男嚟個逆向思維，係咪要學生印證香港自古唔係中國領土呢？
《生果報》玩轉移視線
大家可能覺得奇怪，點解《生果報》出盡九牛二虎之力，近幾日都要喺教科書上「挑骨頭」呢？當中原因，廣男覺得《生果報》係想為考評局考題一事轉移視線；不過客觀效果就係，《生果報》不但挑唔到骨頭，而且成篇報道予人感覺非常「勉強」甚至「得啖笑」。可悲嘅係，如果中史教育連叫學生印證香港自古係中國領土都「有問題」，咁以後中史科仲可以教咩呢？
喺《生果報》報道中，某名教協人士話「歷史探究題目應提供兩面的資料，讓學生自行整合和判斷」，咁依家考評局關於日本對中國係咪「利多於弊」嘅考題無提供兩面資料，套用番果位教協理事嘅講法，考評局係咪已經有預設答案，引導考生去答「日本雖侵華，但對中國而言係利多於弊」呢？如果係曲線地批評考評局以至教協高層嘅，講清楚啲好喎！
圖片來源：GOV.HK
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論