前排，有意參選九龍西立法會選舉嘅本土派區議員李傲然等人，先後宣布退出攬炒派嘅初選，於是網上出現咗一股怒氣，即使係攬炒派支持者，都對於攬炒派大台「逼人」支持現任九龍西立法會議員黃碧雲充滿憤慨；廣男唔係九龍西選民，好可惜無機會「支持」一下黃碧雲，但反政府人士一直支持攬炒派，支持佢哋嘅所謂「35+」（攬炒派要立會過半議席），依家攬炒派大台加民主黨意圖推「舊電池」黃碧雲出嚟再選，廣男只能講句，「黃碧雲？你值得『擁有』」！
民主黨都有人反對黃碧雲
近日有單新聞幾有趣，話說日前民主黨召開特別會員大會，通過現任七名議員出選名單，現任七名議員，當然包括網民「憎到飛起」嘅九龍西立法會議員黃碧雲啦；值得留意嘅係，現任議員黃碧雲有139票贊成佢出選，但反對票都有成50票，即係有成四分之一嘅投票會員反對佢代表民主黨出選。一個「圍內」可控性咁高嘅傳統攬炒派政黨，都有咁多人反對黃碧雲出選，實在係趣聞。
廣男想講，民主黨作為攬炒派第一大黨，單單係鄺俊宇一個「超級區議會」立法會議員，喺上屆立法會選舉就攞接近50萬票，依家決定咩人代表民主黨出選，由大約200人「決定」？套用攬炒派嘅說法，呢個係咪小圈子選舉？選舉有冇代表性呢？
踩住後生仔膊頭，上！
不過，呢個唔係廣男想講嘅重點，呢件事嘅重點，唔止係攬炒派大台或者民主黨推咩人出嚟，而係所謂「35+」策略，只係攬炒派推「自己人上位」、「食人血饅頭」嘅「策略」。喺反政府人士而言，一直喺反修例風波最「出力」嘅人係本土派甚至激進派，好喇，人哋衝又衝完，抗爭又抗爭完，當部分反政府人士想攬炒派「換血」嘅時候，原來被逼退選嘅唔係黃碧雲，而係李傲然或者劉小麗等人，廣男想問一句，呢啲係咪「一將功成萬骨枯」，年輕反政府人士成為「枯骨」，攬炒派老牌政客就「一將功成」繼續可以霸位出選？咁班老一輩嘅攬炒派，擺明踩住班後生仔膊頭繼續「上位」啫！
支持「大台」、支持「35+」，客觀效果就係支持「大台」繼續推啲舊電池出嚟，消費整個修例風波，唔好俾廣男講中，之後初選，由於攬炒派「舊人馬」始終人氣較高，到時被氹到參加初選嘅本土派、新力軍，好可能會成為加持老牌政客「光環」嘅「點綴」。
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論