一名所謂網媒「記者」公然喺直播期間性騷擾女警員，惡行震驚全城；事後，當社會各界都狠批果名記者嘅時候，向來「包庇」自己人嘅記協，只係表示「遺憾」，令唔少人更加憤怒！廣男睇新聞，見到有政黨就事件到平機會投訴，要求平機會按照既定機制同相關條例嚴肅處理事件。廣男絕對認同，對於性騷擾女性嘅人，我哋唔能夠輕輕放過；對於利用「記者」之名、行性騷擾之實嘅人，社會更加要嚴懲，以免俾人覺得「記者做乜都得」！
記者 = 做乜都得？
睇返呢幾日嘅新聞，除咗正氣嘅社會人士對事件咬牙切齒之外，其他組織、人士好似對性騷擾事件無乜感覺咁，例如攬炒派政客，廣男無乜見過佢哋出嚟發聲；身為傳媒工作者組織嘅記協，龜縮咗一段日子，但最後出嚟回應事件，竟然只係用「遺憾」去講件事。廣男唔明白，記協平時唔係「疾惡如仇」嘅咩？點解唔譴責涉事「記者」？點解唔同涉事媒體割席？係咪因為對方係攬炒派「自己友」記協就「唔出聲」？
今次事件，反映咗兩個問題，第一係咪任何人只要自稱係媒體記者，就可以自由穿梭於示威現場，然後可以「為所欲為」？第二個問題，如果有自稱「記者」嘅人出現喺示威現場，但一言一行儼如示威者所為，又有邊個去監察佢哋？本來，呢個角色可以由記協去擔當，但睇依家情況，記協都做唔到呢個角色喇！
違法就要追究！
根據《性別歧視條例》，性騷擾係指任何不受歡迎而涉及性嘅行為，而呢啲行為係一個合理嘅人應會預期受騷擾人士會感到受冒犯、侮辱或威嚇；受害人可以提出訴訟，作進一步追究。今次呢件事，廣男覺得有啲嘢社會各方一定要跟進，第一係受害人要提告，跟住係平機會要調查，最後就係社會各方、即全港市民，一定要繼續批評涉事「記者」同媒體，直至佢哋真誠地向受害人作出道歉甚至賠償（涉事媒體之前道歉，感覺似「應酬」外界多啲）。
傳媒工作者作為「第四權」，依家有被濫用嘅跡象，廣男喺度諗，到底喺示威現場、為數近百人嘅黃背心記者，有幾多係「假記者、真暴徒」呢？
圖片來源：網上圖片、RTHK
請Follow我們的YouTube頻道：
下載我們的手機應用程式，收看第一手精彩內容：
評論