最近，社會激烈討論關於海洋公園嘅「去留」問題，意見分歧非常之大，例如攬炒派政客就認為，與其俾海洋公園一路「蝕落去」，不如引刀成一快，結束營業仲好；而對海洋公園充滿感情嘅香港人，就認為海洋公園既係香港嘅標誌，亦係屬於香港人嘅集體回憶，政府、立法會應該撥款幫海洋公園。囍雨就覺得，海洋公園嘅問題，其實亦都係香港、尤其係旅遊業等行業嘅問題，到底香港歡唔歡迎內地旅客先？如果唔歡迎，莫講話海洋公園，其他主題公園、旅遊業、酒店業以至零售業等等，一樣要「死」！
沒有旅客各行各業「誰都死」？
囍雨姑且當海洋公園結束營運，之後由私人接手或者變成其他主題公園（先唔好當塊地用嚟起樓），好喇，有人繼續營運，但發現原來咁大個公園，而無內地旅客，單靠本地旅客同外地旅客，原來客流根本唔足以支持一個主題公園嘅營運，咁點算？再倒閉？定係好似啲網民咁講，收返海洋公園塊地，用嚟起公屋？無內地旅客支持，一個咁大嘅主題公園，其實係好難營運，大家必須知道，以2018年計算，內地訪港旅客，係超過5,200萬人次。
海洋公園嘅問題，其實亦係香港各行各業嘅問題，以旅遊業咁計，少咗咁大數量嘅內地客，旅遊業界人士點生存？靠外地客，唔夠；靠幫本地客搞外遊甚至搞本地遊，難搞，結論就係無咗最大客源，業界人士只有少部分能夠生存，其他嘅如果唔想餓死，就只好轉行搵食。相同道理，亦能夠應用於酒店業、零售業以至運輸業界，所以黑暴攬炒香港，唔係攬炒一個主題公園或者一個行業咁簡單，而係「攬炒一條龍」，將成個香港「炒起」。
香港人不能迴避問題
所以，對於內地旅客嘅問題，所有香港人都應該要思考，到底我哋係歡迎內地旅客，定係要拒絕內地旅客？如果歡迎但唔想香港人流太多，係咪要考慮、限制來港人數？南區區議會主席羅健熙，曾經以鴉片形容內地客，依家因為無咗「鴉片」，南區兩大景點包括海洋公園同珍寶海洋舫，一個「垂危」，一個「停業」，攬炒派對於救經濟，其實有冇建議、計劃呢？一味講本土優先、服務香港人為主，囍雨真係想問下，啲攬炒派一年去幾多次海洋公園？靠佢哋或者黃色經濟圈支持者，香港真係可以「翻生」？
原圖：中通社
請Follow我們的YouTube頻道：
下載我們的手機應用程式，收看第一手精彩內容：
評論