屹立香港40幾年嘅海洋公園財困，如果唔能夠取得政府撥款「保命」，可能下個月就要倒閉；對於係咪要救香港呢個標誌性嘅主題公園，凡事必反嘅攬炒派，當然係「由得佢死」，例如「議會陣線」立法會議員毛孟靜就揚言，公園係「根本一路蝕」、「收工止蝕罷啦」，民主黨主席、立法會議員胡志偉就促請將公園定位為「香港人嘅公園」，否則難以支持。其實講到海洋公園嘅問題，除咗經營問題，有一點囍雨必須要講，海洋公園絕對係黑暴攬炒香港嘅受害者，只係攬炒派唔會「宣之於口」啫！
讓旅客數字說話
對於海洋公園嘅問題，攬炒派必定會話係海洋公園自己「管理不善」，但囍雨想講，海洋公園基本上相當部分嘅客源來自旅客，尤其係內地旅客，當旅客因為黑暴而銳減，海洋公園根本就好難獨善其身；簡單而言，海洋公園可能係黑暴攬炒香港嘅一大受害者。
睇返2019年嘅旅客數字（當時新冠肺炎未在香港爆發），2019年6月，仲有超過500萬名旅客訪港，到8月得返接近360萬名旅客，9月得返310萬名旅客左右，去到11月更係得返約260萬名旅客訪港，按年跌咗超過55%，喺黑暴攬炒、旅客大減嘅情況下，海洋公園點會好生意，或者保持到一定嘅旅客數量呢（有報道指海洋公園入場人士當中，內地客及海外客分別約佔40%和20%）？
疫情後內地旅客不來又如何？
旅客減少，海洋公園要營運都相當不容易；退一步講，如果疫情完結後，如果黑暴減少甚至「消失」，海洋公園生意又會唔會好？配合喺經營方面下工夫，會唔會重回昔日光輝？問題亦都係旅客數量問題，大家會唔會認為內地旅客比以往一樣咁「鍾意」嚟香港？嚟香港旅行，要受香港人「氣」，點解內地旅客非來不可？除咗海洋公園，整個香港都要思考，喺旅客問題上，我哋係咪要繼續玩「零和遊戲」呢？每年數以百萬計內地旅客，我哋都要放棄？如果呢種思維不變，亦再無一種「過門都係客」嘅待客之道，內地客唔嚟，唔係內地客利益「受損」，而係香港市民生計受影響。
近日，囍雨喺網上見到一啲網民話，海洋公園一向賺內地客錢，依家「出事」就要問香港政府「攞錢」，意指海洋公園對港「無甚貢獻」；坦白講，海洋公園養活最少2,000個員工，涉及2,000個家庭嘅生計，呢啲唔係貢獻？海洋公園亦一直肩負起關於保育工作嘅教育，呢啲又唔係貢獻？坦白講，對一個陪伴我哋成長嘅主題公園，就算基於計算而覺得海洋公園難營運，都唔需要咁苛刻嘅。
原圖：中通社
請Follow我們的YouTube頻道：
下載我們的手機應用程式，收看第一手精彩內容：
評論