講到壹傳媒老闆黎智英的是非醜聞，囍雨認為絕對可以用「罄竹難書」四個字嚟形容。先唔講佢反中亂港果筆，近期媒體又不斷揭發黎智英及其名下公司涉嫌違法香港法例，包括涉違反地契「秘撈」、名下公司可能有稅務問題，仲涉無牌經營秘書公司甚至可能已經觸犯《打擊洗錢條例》等等，可以話一單嚴重過一單。囍雨第一樣諗到嘅問題，就係所有與之相關嘅政府機構、執法部門，係咪應該馬上行動、介入調查？囍雨必須講句，千祈唔好因為對方係黎智英、有財力或者有勢力，就「縮手縮腳」；法律面前人人平等，絕對唔可以只係一句空話！
喺呢度，囍雨首先想重點同大家分析下，黎智英名下果間「力高顧問有限公司」嘅問題。簡單而言，呢間聲稱提供「公司秘書」服務嘅公司，經公司註冊處證實，原來根本冇領過相關業務牌照，即係「無牌經營」，因此已經違反《打擊洗錢條例》嘅相關規定，呢樣其實係嚴重罪行，隨時監都有得坐！
正常嚟講，一間公司喺香港做「公司服務」生意，冇乜可能唔知道要註冊、攞牌；而囍雨最諗極都諗唔明嘅地方，就係「力高」嘅另一個股東，其實就係壹傳媒執董兼財務總裁周達權，試問一間由會計師出身嘅人士做股東嘅公司，又點會犯無牌經營咁「低級」嘅錯誤？抑或，有不可告人嘅內情？
囍雨其實仲有個聯想。近年嚟，黎智英不斷被指係香港攬炒派最大嘅幕後金主；大家可能仲有印象，前兩年已經有媒體連篇揭發一啲盲反派政客例如梁國雄、李卓人等，收受黎智英嘅「政治獻金」嘅報道，咁囍雨又不禁要問，黎智英嘅公司除咗可能涉及洗錢之外，仲會唔會同一啲「政治活動」有牽連呢？
若干問題 要一併跟進！
嗱，依家黎智英被揭發嘅「秘撈」公司就至少有16間，而喺佢次子黎耀恩名下，都至少有9間食肆及公司，加加埋埋已經廿幾間，咁呢啲公司咁多年嚟所從事嘅「業務」，又係咪佢哋表面所聲稱嘅咁「簡單」？會唔會同果間「力高」有類似問題？有關執法部門係咪應該查多啲、查深啲呢？
囍雨唔否認，黎智英作為一間傳媒集團嘅創辦人，佢本人同佢旗下嘅傳媒機構，都對輿論生態有一定影響，但從來冇一條道理話過，如果「傳媒人」涉嫌犯事就唔查得、唔拉得、唔告得嘛！大家不妨審視一下，單單一個壹傳媒集團大樓地址，就已經有咁多間公司「共用」，有啲又關黎智英兒子事，佢黎智英本人又成日「捐款」俾啲政客，咁成件事，內裡仲有幾多不為人知嘅嘢呢？
早兩日，黎智英涉嫌嘅「參與未經批准集結」同「刑事恐嚇」兩條罪已經提堂，囍雨想講，仲有地契問題、稅務問題，以至無牌經營、涉嫌違反洗錢條例等，都係時候應該一併跟進。曾經有人炮製所謂「刑不上黎智英」，囍雨就話，香港從來冇呢支歌仔唱！
請Follow我們的YouTube頻道：
下載我們的手機應用程式，收看第一手精彩內容：
評論