喺香港打開門做生意，好多嘢都講求「資格」；莫講律師、醫生執業要攞牌，就算喺街邊開檔賣魚蛋，都起碼要有個食環署嘅衛生牌照。呢個制度，唔單止係專業嘅表現，更加係法治嘅體現。如果一間公司違法違例「搞生意」，囍雨諗到嘅最大可能性，就係有「唔見得光」嘅嘢。
講緊邊個？咪又係壹傳媒老闆黎智英囉！早前佢被踢爆名下（或親信名下）有至少16間「秘撈」公司，全部既涉違反地契攞公帑補貼、又被質疑有稅務問題，但件事仲未完㗎，囍雨之前同大家提過嘅果間聲稱提供「公司秘書」服務嘅「力高顧問有限公司」，原來根本就係「無牌經營」，無向公司註冊處申請相關服務牌照，咁黎智英係咪又涉多一條罪？
最高刑罰可判監
事緣喺媒體不斷追查之下，公司註冊處明確回覆指：「根據本處的紀錄，『力高顧問有限公司』並未曾向本處申請信託或公司服務提供者牌照。」大家可能會問，咁究竟有「幾大問題」呢？囍雨可以清楚話俾大家知：係嚴重罪行！嚴重者隨時監都有得坐。因為根據香港法例第615章《打擊洗錢及恐怖分子資金籌集條例》：任何人如果喺香港無牌經營信託或公司服務業務，即屬犯罪；一經定罪，最高可被處罰款十萬元及監禁六個月。
根據公司註冊處提供嘅資料，由2018年3月到上個月底，已經有110間公司因為違反相關條例被檢控，其中就包括無牌經營公司服務業務嘅公司。囍雨好奇之下睇番資料，原來真係有成功檢控並判刑嘅例子，前幾年就有間公司（在此隱去真名）因為無牌經營公司秘書業務，結果被處罰款五萬元、「釘牌」六個月。
不能輕放黎智英
咁問題嚟啦！黎智英果間「力高顧問有限公司」成立咗超過30年，依家就被揭發至少幫緊黎智英次子黎耀恩名下至少9間食肆、公司提供「公司秘書」服務，咁囍雨要問，呢間「力高」究竟無牌經營咗幾耐？作為「力高」股東之一嘅黎智英（另一位股東為該集團執行董事兼財務總裁周達權），係咪已經涉嫌犯法？如果一切查證屬實，咁佢犯罪嘅嚴重程度，距離「最高刑罰」又仲有幾遠呢？多名專業人士都表明關注事件，涉犯如此嚴重法例，警方應盡快介入調查！
依家黎智英「秘撈」嘅問題越揭越多，囍雨認為，相關執法部門係時候要有所行動。徹查無牌經營係一方面，另一方面大家唔好忘記，壹傳媒大樓 (《蘋果日報》總部)涉違地契嘅問題、佢名下十幾間公司可能牽涉嘅稅務問題，依家都似乎未見有下文。囍雨想講，千祈唔好因為黎智英生意做得大或者係社會名人就「怕」咗佢，執法機構一定要依法辦事、秉公處理，該檢控就檢控、該收地就收地、甚至該判坐監就要判，唔好因為對象係黎智英就輕輕放過，只有咁，先至會讓其他地方對香港嘅營商環境有信心，睇到香港嘅專業同法治！
請Follow我們的YouTube頻道：
下載我們的手機應用程式，收看第一手精彩內容：
評論