近日有學校嘅「問題教材」、「問題教師」備受關注，日前又有家長向傳媒投訴，批評趙聿修紀念中學有一份通識教材，內容以偏概全、帶有偏見，例如書中竟然指違法佔領中環期間學生行為「獲得讚賞」、又醜化內地，稱內地人「事事向錢看、打尖」，甚至在講述「重要概念」的部分，又提出「西環治港」、「中央干預」等「指控」。事後教育局確定有關資料屬於「筆記」，學校本年度已經停用，但廣男就覺得，件事唔係一句話停用就等於解決咗，當中有好多疑問未解答，例如有無教師要為事件負責、教材有否涉及違規等等，教育局一定要繼續跟進、交代。
是否只有單一觀點？
上述通識科教材出現疑似偏頗、「洗腦」嘅內容，廣男覺得有一點需要釐清，到底涉事教師係點用嗰份教材？搞小組討論、問學生支唔支持，定係有其他用途？而更重要嘅係，到底教材係提供單方面嘅觀點，定係有齊正、反方嘅觀點？通識科要引導學生多元思考，要有不同觀點做對比，咁先可以俾學生客觀理解事件，如果教材只係得單一角度，根本就係向學生「洗腦」、灌輸政治立場，咁樣呢份教材就明顯有問題，如果證實有教師用偏頗內容或錯誤資料誤導學生，校方同教育局一定要追究到底。
教學內容、教材屢出問題
其實最近類似嘅事件不斷發生，之前有小學常識科教師就歪曲史實，將鴉片戰爭起因講成「英國為『禁煙草』攻打中國」；又有中學歷史教科書，聲稱引述西方學者，抹黑林則徐禁煙「輕率」、「不明智」。廣男覺得，依家「問題」教師、教材嘅醜聞越揭越有，反映事件只係冰山一角，而各方每一次都係「後知後覺」，等有新個案出現，再逐單投訴處理，如果唔從根源解決問題，審視點樣阻止「問題」教師、教材出現，同類事件只會沒完沒了，不斷重覆發生。
唔理係教師教學內容，或者係教科書都好，如果內容有偏頗或錯誤資料，學生可能會受到影響。大家可以想像到，如果教材向學生灌輸錯誤觀念，例如將暴力抗爭「英雄化」、宣揚「違法達義」思想，學生未必能分清當中嘅是非對錯，結果隨時誤信歪理，成為黑暴分子而自毀前程，大家想見到咁樣嘅事發生咩？今日睇新聞，先有一個22歲嘅青年，認咗暴動罪等待判刑，我哋如果唔想再見到呢啲新聞，就要由教育方面著手，盡力遏止年輕人被洗腦、荼毒。
圖片來源：文匯報
請Follow我們的YouTube頻道：
下載我們的手機應用程式，收看第一手精彩內容：
評論