為咗打破立法會內會被盲反派「拉布」癱瘓嘅困局，立法會主席梁君彥早前尋求外間法律意見，噚日已經公布咗詳情。對於外間兩位資深大律師都認為，現任內會主席李慧琼有權有責處理番議會事務，一眾盲反派梗係唔啱聽喇，囍雨見到，今日公民黨立法會議員陳淑莊就出嚟講，會盡量喺今個星期五內會召開之前，搵另外兩位資深大律師提供意見。嗱，重點嚟喇！陳淑莊就話，律師費估計要35萬元，依家22個泛民議員夾咗11萬元，其餘20幾萬元就想透過眾籌應付。囍雨第一反應就心諗，唔係嘛？！咁多位薪高糧凖嘅尊貴議員，一人夾多萬幾蚊都已經足夠有凸啦，為乜仲要眾籌呢？定係想扮可憐博同情啊？！
高薪厚祿 只出5000
囍雨計過條數，按照陳淑莊嘅講法，即係22個泛民議員依家只要人均出5,000元，就籌夠數；35萬元律師費，對於好多市民嚟講可能係好大筆錢，但對於呢班立法會議員，情況又好唔同。大家諗下，先唔計泛民其他黨派，單係公民黨就有5位立法會議員（陳淑莊、楊岳橋、譚文豪、郭家麒、郭榮鏗），佢哋每人每月都收緊10萬蚊薪酬；過多兩個月，每人仲有近70萬元約滿酬金袋袋平安，相比之下，依家區區廿幾三十萬元都要伸手向市民攞錢？唔係咁肉酸啊！好唔好意思先？
至於有冇市民響應捐錢，囍雨就認為呢啲係個人自由，但喺度就必須提醒一句，係咪應該先諗下，筆錢捐俾佢哋係用嚟做咩？陳淑莊話就話「等大家多一個參考」，咁大家又要諗，佢哋會唔會用筆錢嚟「益自己友」呢？（囍雨聽聞盲反派已經聘得大律師公會主席戴啟思，及大律師公會執委、民主黨黨員譚俊傑）而且大家唔好忘記，盲反派搞眾籌唔係第一次，之前林卓廷又話籌200萬元、許智峯又話要300萬元，但最後啲錢去咗邊？益咗邊個？仲有，如果今次佢哋籌完錢、攞咗法律意見之後，又繼續喺內會「對著幹」，咁咪即係等於大家出錢俾呢班人嚟攬炒自己？
大狀黨都冇人「幫手」？
講真，就算陳淑莊等人真係要扮客觀攞法律意見，囍雨心諗，公民黨本身就出嗮名係「大狀黨」，佢哋自己都有好多大律師或者資深大律師啦，例如余若薇、梁家傑、楊岳橋等等，點解仲要使市民嘅錢去尋求法律意見呢？退一步講，就算「人情還人情、數目要分明」，咁叫余若薇、梁家傑等大狀「收順啲」都搞得掂喇！抑或，自己人都唔肯接呢單「生意」啊？
其實噚日睇到郭榮鏗「一支公」出嚟見記者回應法律意見，囍雨都覺得有啲「怪怪哋」，因為由頭到尾，公民黨同其他泛民都好似玩失蹤、鴉雀無聲咁，係咪依家見勢色不妙，都另有打算呢？佢係咪變咗「棄卒」？囍雨就喺度諗，郭榮鏗最後會唔會變成「林子健第二」，依家真係唔知，不過，所謂嘅「齊上齊落」就真係唔見囉。郭榮鏗被指公職人員行為失當，係好嚴重嘅刑事罪，其他人梗係唔好跟車太貼喇！所以有時真係不得不感慨一句「人情如紙薄」，大家又不妨估下，日後等到郭榮鏗真係「有事」，呢班盲反派仲有幾多「人情」？囍雨就話，咪最多5000元咁大把囉！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論