囍雨前排同大家講到，壹傳媒老闆黎智英被網媒踢爆涉嫌違反地契搞秘撈，就係喺《蘋果日報》位於將軍澳工業邨嘅總部，開咗間為其他公司提供「公司秘書」服務、名為「力高顧問有限公司」嘅公司；被踢爆之後，呢間「力高」公司已經第一時間急急腳「搬竇」，但原來，成件事到呢度未算完，續集仲精彩……
16間「秘撈公司」全部同時間急急搬竇
媒體追查之下發現，原來喺黎智英及其「親信」名下（包括黎智英近身助理、曾任職美國中情局嘅Simon Mark），除咗果間「力高」之外，至少仲有15間公司，被踢爆之前，都係以將軍澳工業邨壹傳媒大樓（即係《蘋果日報》總部所在地）為註冊地址，而且唔少都「歷史悠久」（其中一間更足足成立有45年咁耐），不過，就似乎統統同「傳媒、印刷」行業冇乜關係喇，甚至其中一間疑係間空殼公司；而最此地無銀三百兩嘅，係當呢批公司被揭發之後，依家竟然一次過突然同日全部「搬竇」。
咁新嘅問題嚟喇！囍雨唔理黎智英同佢嘅親信，業務範圍有幾「廣泛」都好，呢批公司全部出現喺享受巨額公帑補貼嘅工業邨用地，就係好大問題！大家唔好忘記，之前提及嘅果間「力高顧問有限公司」，根據地契，已經明顯唔係做緊同「傳媒及印刷」相關嘅業務，依家一下子又揭多十幾間出嚟，呢批公司又係做緊咩呢？講真，如果佢哋符合地契條例，何須急忙「搬竇」？但如果違反地契，咁究竟違反咗幾耐？因為其中牽涉嘅，係唔知佢哋違規享用咗幾多公帑補貼？
除了涉違地契 有無瞞稅漏稅？
另一個問題，係如果查證黎智英嘅「秘撈」生意全部屬實，咁稅務租務方面有冇問題？呢樣嘢，大家應該多角度諗一諗，首先係呢批公司本身，有冇瞞稅漏稅？佢哋「坐享」補貼地皮，使唔使向集團交租？另一方面，壹傳媒作為一間上市公司，「旗下公司」嘅資料係咪全部詳盡顯示喺集團嘅稅務報表上面？有冇人喺集團股東唔知情、甚至蒙受損失而不自知嘅情況下，暗中「補貼」其他公司？對於越揭越多嘅問題，囍雨就認為，稅務局要查，廉署要查，甚至政府其他執法部門，都要詳細追查。
其實縱觀已知嘅資料，囍雨認為件事嘅性質基本已經呼之欲出，就係黎智英同佢嘅壹傳媒，作為全香港最大嘅反政府媒體，一邊佔政府「便宜」一邊反政府。呢幾日囍雨都特別有留意，睇下黎智英會唔會有咩回應，不過就似乎完全唔覺有，係咪忙緊「搬竇、善後」呢？所以囍雨喺度建議，大家千祈唔好放鬆追查，唔好俾線索斷咗，因為如果最後一切查證屬實，囍雨相信，就唔係「收番塊地」就可以了事咁簡單啦！
原圖：大公報
請Follow我們的YouTube頻道：
下載我們的手機應用程式，收看第一手精彩內容：
評論